ഛായ

ഒരേ മുഖച്ഛായ.
ഒരു കടലിന്റെ
ഒരേ തീരത്തൊറ്റക്കൊരേയിരിപ്പാണ്‌
ഇരുവരെങ്കിലും.
തിരയനേകമായ്‌പ്പെരുകിയെങ്കിലും
പകലും സന്ധ്യയും പലതരം രാവും പഴയകാലവും
പുതുതും ഭാവിയു-
മുരുകിയാഴങ്ങളിളകിയെങ്കിലും
ഒരേ മുഖച്ഛായ.

ഇരു പ്രതിബിംബം
ചിതറിപ്പൊന്തുമ്പോളൊരേ മുഖച്ഛായ

ഇവരാരാണെന്നു പറയുവാനുള്ള-
തറിവിലുമില്ല ഒഴിവിലുമില്ല.

ഒരേപ്രണയത്തിന്നിരട്ടപ്പേറെന്നോ
ഒരേ ഗാനത്തിന്റെയിടയ്ക്കക്കൊട്ടെന്നോ
ഒരേ സര്‍പ്പത്തിന്റെ പിളര്‍ന്ന നാവെന്നോ
പറയുവാനാര്‍ക്കുമുറപ്പെടുന്നില്ല.

ഒരേയിരിപ്പാണ്‌
ഇരുവരെങ്കിലും
ഒരേ മുഖച്ഛായ

ഒരു കടലിന്റെ ഇരുട്ടുകോട്ടയില്‍
ഒരു കടലിന്റെ വെളിച്ചത്തീക്കാട്ടില്‍
ഒരു കടലിന്റെ മുഴുഘടികാര-
പ്പകര്‍ച്ചക്കഴ്ച്ചയില്‍
ഒരേ മുഖച്ഛായ.

അടിമുതല്‍ താടി വരെ
വിരുദ്ധമാമുടലിലൂടോര്‍മ്മ-
യിരുധ്രുവങ്ങളായ്‌ -
പ്പതഞ്ഞു പോകിലും
ഒരാള്‍ ചിതക്കുള്ളില്‍ക്കിടക്ക നീര്‍ക്കിലും
ഒരാള്‍ തലക്കുള്ളില്‍ കലപ്പ കോര്‍ക്കിലും
ഒരേ മുഖച്ഛായ.

ഒരു കടലിലെ ഒരു മുഖച്ഛായ
ഇരുവരെങ്കിലും.