sreekumarkariyad

sreekumarkariyad: അവിടെ നർമ്മദ ഉണ്ടായിരുന്നോ?

2009-09-30T07:20:00.000-07:00

sreekumarkariyad: അവിടെ നർമ്മദ ഉണ്ടായിരുന്നോ?

sreekumarkariyad: എ ഫ്യൂഡല്‍ ഓണ്‍ട്‌ ഗോഡസ്സ്‌ ഏന്റ്‌ ഹര്‍ ഓംലെറ്റ്സ്‌

2009-09-26T09:59:00.000-07:00

sreekumarkariyad: എ ഫ്യൂഡല്‍ ഓണ്‍ട്‌ ഗോഡസ്സ്‌ ഏന്റ്‌ ഹര്‍ ഓംലെറ്റ്സ്‌

ചിറകടികളുടെ ദേവതയുണ്ടെന്‍ ചിറകില്‍ വാനം ചുറ്റിയടിക്കാന്‍

2008-12-02T08:57:00.000-08:00

ദേവത

ചിറകടികളുടെ ദേവതയുണ്ടെന്‍
ചിറകില്‍ വാനം ചുറ്റിയടിക്കാന്‍
കൂടുണ്ടാക്കാന്‍ കൂടിന്‍ ദേവത
കൂടെ. കൂവാന്‍ തൂവല്‍ മിനുക്കാന്‍-..........(വായിക്കാം)

അയല്‍വാസി ഒടിവെച്ചു. അവന്‍ പാഞ്ഞു ഗള്‍ഫിലേക്ക്‌.

2008-12-01T05:29:00.000-08:00

ഒടി (click hereto read this poem full)

അയല്‍വാസി ഒടിവെച്ചു.

അവന്‍ പാഞ്ഞു ഗള്‍ഫിലേക്ക്‌.

ഒടിയുടെ പാണ്ടുകള്‍

മണലില്‍ ഉരച്ചു കഴുകുമ്പോള്‍

ഒരു കൂറ്റന്‍ അറബിയെക്കണ്ടു............
.......................
..

തലമുടിയില്‍നിന്നുതുടങ്ങണം എല്ലാം. ഈശ്വരനായാലും എതിര്‍ലിംഗമായാലും .....

2008-11-29T23:36:00.000-08:00

അഗ്രേ പശ്യാമി (click here)

എ ഫ്യൂഡല്‍ ഓണ്‍ട്‌ ഗോഡസ്സ്‌ ഏന്റ്‌ ഹര്‍ ഓംലെറ്റ്സ്‌

2008-06-08T04:23:00.000-07:00

മുട്ട പൊരിച്ചുതരുമമ്മായി

വെള്ളയില്‍‍നിന്നും പിടഞ്ഞെണീറ്റ്‌
മഞ്ഞയിലുപ്പും കുരുമുളകും
ചെല്ലുമ്പോള്‍ വായെല്ലാം കപ്പലോടും

വിദ്യയിതെന്നു പഠിച്ചമ്മായീ?
മുട്ടത്തോടെങ്ങു കളഞ്ഞമ്മായീ?

മുട്ട പൊരിച്ചുകഴിഞ്ഞാലോട്ടു-
ചട്ടുകം തെയ്യച്ചുവടുവെക്കും
മഞ്ഞയും വെള്ളയും ചൂടും ചൂരും
വെള്ളിപ്പിഞ്ഞാണത്തില്‍ച്ചെന്നു ചാടും
സ്വപ്നത്തിലാരോ ഞെരടിച്ചോന്ന
പച്ചമുലകളിളക്കിക്കൊണ്ട്‌
അമ്മാവന്മാരുടെയായുര്‍‍രേഖ
ചെന്നുമിനുത്തൊരുടല്‍ വിയര്‍ത്ത്‌
പാഞ്ചാലിയമ്മായി വൃത്തശില്‍പ്പം
വാഴയിലയില്‍ പ്പകുത്തുവയ്ക്കും
കുട്ടികള്‍ ഞങ്ങള്‍ കൊതിപിടിച്ചാ-
മുട്ടേപ്പസാഹിത്യം തിന്നുതീര്‍ക്കും
ആശാനുമുള്ളുരും വള്ളത്തോളും
വേശയമ്മായി തന്‍ നാവിലാടും

മുട്ടകളെന്നും പൊരിയും വീട്ടില്‍
കുട്ടികളേയും പെറുമമ്മായി
വിദ്യയിതെന്നു പഠിച്ചമ്മായി?
പദ്യപ്രവീണയാമെന്നമ്മായി?

അവിടെ നർമ്മദ ഉണ്ടായിരുന്നോ?

2008-06-08T01:50:00.001-07:00

ഇവിടെ നര്‍മ്മദ ഉണ്ടായിരുന്നോ?
മക്കള്‍ ചോദിച്ചു.
മണലില്‍ പലതും നടന്നതിന്റെ പാടുകള്‍
ഞാന്‍തൊട്ടടുത്തുനിന്നവളുടെ
സാരിയൂരി മൂടി.
മദ്യപിച്ച്‌ മറിഞ്ഞ എന്റെ പ്രൊഫസര്‍മലയെ
കളിവിളക്കുപോലെ സൂര്യന്‍കാത്തു.

പാരിസ്ഥിതികപ്രശ്നങ്ങള്‍ക്കിടക്ക്‌
മക്കളോട്‌ ഞാന്‍'ജനറല്‍ക്നോളഡ്ജ്‌ ' ചോദിച്ചു
പടിഞ്ഞാറ്‌?
ചാടിയുത്തരം 'ചുവന്ന കടല്‍
കിഴക്ക്‌?
ചാടിയുത്തരം 'കാവിക്കടല്‍ '
തെക്ക്‌?
മൂത്തവന്‍കവിയായി 'എരിഞ്ഞടങ്ങല്‍
രണ്ടില്‍ ഗുളികന്‍ നിന്നവന്റെ
തലക്കു ഞാന്‍ കിഴുക്കി

ഉള്ളങ്കയ്യില്‍ ജലം എടുക്കുമ്പോള്‍
ഓര്‍മ്മ വരണം മുത്തച്ഛന്‍ പറഞ്ഞത്‌.
'ഗംഗേ ച യമുനേ ചൈവ
ഗോദാവരീ സരസ്വതീ
നര്‍മ്മദേ സിന്ധു കാവേരീ'
ബാക്കി എനിക്കോര്‍മ്മ വന്നില്ല
'കവിമോന്‍' കൊള്ളിച്ചു ചിരിച്ചു.
ഇതിനിടക്ക്‌
നരകാസുരവധം കഴിഞ്ഞ ആകാശം
പോലെയായി ഇളയവള്‍
ഞാനുമ്മവെച്ചുപോയ്‌ ആ ചെങ്കൊടിയെ.

കാര്യവിചാരിപ്പുകാരി
ഭാര്യ പറഞ്ഞു;
'മണല്‍ വാരികളുടെ കൂടെ കുടിയ്ക്കരുത്‌
ചന്തി കഴുകാന്‍കടവില്‍ പോകരുത്‌
ചന്തമുള്ള വഞ്ചിയിലേ ഇരുന്നു പാടാവൂ
ചിന്തയില്‍ എപ്പോഴും കരുതണം
കാളിയേയും കുറുമാലിപ്പുഴയേയും'

ശുന്യതയില്‍ നിന്നെടുത്ത
അഞ്ഞൂറിന്റെ സത്തകൊണ്ട്‌
ടൈറ്റാനിക്‌ ഉണ്ടാക്കി ഒഴുക്കി
ഞാനവള്‍ക്ക്‌ ആദ്യത്തെ
ഹാര്‍ട്ട്‌ അറ്റാക്ക്‌ കൊടുത്തു.
അഗസ്ത്യന്റെ ഇരട്ടക്കുടങ്ങള്‍ മുഴക്കിയ
കവേരീപുരാണം അവസാനിച്ചു.

അടുത്ത ദിവസം തൊട്ട്‌ എനിക്കു തൊടങ്ങി

പെരിയാര്‍എന്റെ താടി കത്തിച്ചു
നിള ലിംഗം ഞെരിച്ചു
കബനി വാള്‍കാതില്‍ ത്തറച്ചു
മണിമലയാറും നെയ്യാറും പമ്പയും
എന്നെ ഒരു ഇരുമ്പുപലകയില്‍ ക്കിടത്തി
ഷോക്കടിപ്പിച്ചത്‌
തെല്ല് തെളിയുന്നുണ്ട്‌
ചുറ്റുകൂടിയ നദികള്‍
വിലക്ഷണമായ എന്റെ പ്രതിബിംബം
അട്ടഹാസങ്ങളോടെ വാരിക്കോരിപ്പൂശി.

ഇന്നലെ ഭ്രാന്തു മാറി .
തല മൊട്ടയടിച്ചു
അമ്മ തന്ന തേങ്ങാപ്പൂള്‍കൊതിയോടെ തിന്നു
ഇപ്പോള്‍
വറ്റിപ്പോയ കൃഷ്ണമണികളോടെ
തിണ്ണയിലിരുന്ന്
സുഗതകുമാരിയെ വായിക്കുന്നു

എന്നിട്ടും എന്തോ അസ്വസ്ഥത
ഒന്നു ചിരിക്കണമെന്നുണ്ട്‌.

ഇടതുകണ്ണിലും വലതുകണ്ണിലും

2008-06-07T23:21:00.001-07:00

അച്ഛന്റെ മുഖത്ത്‌
രണ്ടു തിമിരങ്ങളുണ്ടായിരുനു
ഇടതുകണ്ണിലും വലതുകണ്ണിലും

'ആത്മാവ്‌ ദാ' എന്ന്‌
അച്ഛൻ വലതുകൈ ചൂണ്ടിക്കാണിക്കുന്നു

ആർക്കും ഒന്നും മനസ്സിലായില്ല

പടവുകളിലൂടെ അച്ഛൻ
എങ്ങോട്ടോ കയറിപ്പോകുന്ന മട്ടുണ്ടായിരുന്നു.

ആരെയോ തൊട്ട ആനന്ദം
കുളിരനുഭവപ്പെട്ടവന്റെ നില.
'മക്കളെ വരിക ' എന്ന്‌ പതറിയ പറച്ചിൽ.

പിറുപിറുപ്പുകളുടെ മുഖത്തേക്ക്‌
അമ്മ പുച്ഛത്തോടെ നോക്കുന്നു
ചേച്ചി മുല കുലുക്കി ചിരിച്ചു രസിക്കുന്നു
ചേട്ടന്‌ വലിയ ഗൗരവങ്ങൾ വീണ്ടും കടന്നുവരുന്നു.

എറ്റവും
ഇളയവനായ ഞാൻ
അച്ഛന്റെ പടവുകൾ കണ്ടു.

രണ്ടു തിമിരങ്ങൾ ചേരുന്നിടത്ത്‌
അച്ഛനെക്കാത്ത്‌ ഒരാൾ
അവിടെ നിൽക്കുന്നു.

ഇന്നലെവരെ കാണാത്തൊരാൾ

2008-06-07T23:04:00.000-07:00

ഉഗ്രവർണ്ണ ഡിസൈനുകൾ ചേരും
ഷർട്ടണിഞ്ഞ്‌ വസന്തം വരുന്നു
ചുണ്ടിലുണ്ട്‌ ചുരുട്ടതിൽനിന്നും
ചെണ്ടുലഞ്ഞ്‌ സുഗന്ധം പരന്നു

അറ്റമില്ലാത്ത മീശനീൾത്തുമ്പിൽ
പറ്റമായിത്തുളുമ്പുന്നു തുമ്പി
ആർത്തിരമ്പിക്കുതിച്ചുള്ള പോക്കിൽ
ഷൂസുകൾ ഹയ്യ! താമരപ്പൂക്കൾ!
കോട്ടുമിട്ടക്കരിവണ്ടുടുത്ത
ക്കാട്ടിലും പൂപ്പരേഡെടുക്കുന്നോ?
അർദ്ധരാത്രിക്കരിമ്പനമേലും
അർത്ഥപൂർണ്ണം സുമം വന്നുദിച്ചോ?
അർത്ഥപൂർണ്ണം 'സ്മെയിൽ' വന്നുദിച്ചോ?

നിദ്രചെന്നു വിളക്കണയ്ക്കുമ്പോൾ
നിശ്ചലതക്കിനാവണയുമ്പോൾ
ഒത്തുകിട്ടുന്ന പാറയിൽ സ്വന്തം
വിശ്രമം അവൻ നിശ്ചയിക്കുന്നു
വിശ്രമം അവൻ കൊത്തിവെക്കുന്നു

തൊപ്പിപല്ലുകൾ താഴെ വെക്കുന്നു
പെട്ടി മെല്ലെത്തുറക്കുന്നു കൈകൾ
പുഷ്പബാണമല്ലുജ്ജ്വലമപ്പോൾ-
പ്പൊട്ടുമമ്മട്ടുബോംബിന്റെ കൺകൾ
തെല്ലു പുഞ്ചിരിക്കൊണ്ടതുവീണ്ടും
മല്ലികപ്പൂവുപോലെയാകുന്നു

ഇന്നലെവരെക്കാണാത്തൊരാളെ
ഇന്നു കണ്ടു നാം ഞെട്ടിത്തെറിക്കെ
തൻ മുഖംമൂടി മാറ്റിക്കുയിലി-
ന്നുന്മദം രൂപമായ്പ്പരുങ്ങുന്നു.

ഉഗ്രവർണ്ണ ഡിസൈനുകൾ പൊട്ടി-
ഷർട്ടു കീറിപ്പറിഞ്ഞിരിക്കുന്നു
ഉഗ്രവർണ്ണഡിസൈൻകളിൽ പാറ-
ക്കെട്ടു പൊട്ടിത്തകർന്നിരിക്കുന്നു.

എന്റെ മുറിയിൽ ഭൗതികങ്ങളുടെ ഇടയിൽ നടന്നത്‌

2008-06-07T22:40:00.000-07:00

ഷൂപോളിഷ്‌
പായ്ക്കറ്റുപ്പ്‌
മോമിന്റെ കഥാസമാഹാരം
പാതിബ്രെഡ്‌
കൊതുകുവല
തടിയൻ ഹാർമ്മോണിയം
സർവ്വോപരി ഞാൻ.
ഇതെല്ലാം ചുറ്റി
ഈ ഉറുമ്പിൻജാഥ
എങ്ങോട്ടാണ്‌ പോകുന്നത്‌?

ഉത്തരം ബാബു പറയു.

അന്തിനിഴൽ ആയിരം കാതം
അറബിക്കടൽ അനന്തത
ഇതൊന്നും ചുറ്റാതെ ഇവ
മറ്റേപകുതി ബ്രഡ്‌ തേടിപ്പോകുന്നു.

അതിനുചുറ്റും
വാഷിംഗ്സോപ്പ്‌
പായ്ക്കറ്റുമുളക്‌
യേറ്റ്സിന്റെ കവിതാസമാഹാരം
നീളൻ ഗിറ്റാർ
സർവ്വോപരി നീ.

ഉത്തരം ബാബു പറഞ്ഞു

ജാം പുരണ്ട ഉറുമ്പുകൾ
എട്ട്‌ എന്ന സംഖ്യ എഴുതി
ബൂർഷ്വാ മുറിയെ
ബന്ധിച്ചു.

ഭൂമിയുമാകാശവും

2008-06-07T21:54:00.000-07:00

1.
ഒരു മരണം സംഭവിച്ചിട്ടുണ്ട്‌.
പീറ്റർ വണ്ടിയിടിച്ച്‌ മരിച്ചു.
വാഹനങ്ങളുടെ ഒരു ഭൂമി തെളിയുന്നു
റോഡരികുപറ്റി പീറ്റർ.
അവനെത്തൊടാതെ
എത്രയോ വാഹനങ്ങൾ പോകുന്നു?

കൃത്യസമയത്ത്‌
ഒരു വണ്ടി
കുടിച്ചു കൂത്താടി
ജീവിതത്തിന്റെ അതിരു വെട്ടിച്ച്‌
അവനെ ഇടിച്ചിടുന്നു

പീറ്റർ വണ്ടിയിടിച്ച്‌ മരിച്ചു.

വലിയ ആംബുലൻസിൽ
കദനവാഹനങ്ങളുടെ അകമ്പടിയോടെ
വീട്ടിലേക്കു കയറി
ലില്ലിയുടെ ജീവിതത്തിനുമുമ്പിൽ
പ്രിയൻ പീറ്റർ കിടന്നു

അച്ചൻമാർ അയൽക്കാർ
ബന്ധുക്കൾ
വന്ധ്യമായ തന്റെ ഗർഭപാത്രം
എല്ലാം
അലംകൃതമായ ഒരു കേക്കിന്റെ രൂപത്തിൽ
ഇന്നും ലില്ലിയുടെ മനസ്സിലുണ്ട്‌.
ഭൂമി കുഴിച്ച്‌ പീറ്ററെ അടക്കിയതും
ഇടിച്ച വണ്ടി വീണ്ടുമോടിത്തുടങ്ങിയതും
ഓർത്ത്‌
ഭൂമിയുടെ അരികുപറ്റി
ലില്ലി പോകുന്നു

അവൾക്ക്‌ ഭൂമി മാത്രം.

2.

ഒരു മരണം സംഭവിച്ചിട്ടുണ്ട്‌.
പീറ്റർ തൂങ്ങിമരിച്ചു.

ചില്ലകളുടെ ഒരു ആകാശം തെളിയുന്നു
മാഞ്ചുവട്ടിൽ പീറ്റർ.
അവനെ ഗൗനിക്കാതെ
എത്രയോ ചില്ലകൾ പോകുന്നു?

കൃത്യസമയത്ത്‌
ഒരു കുരുക്ക്‌ കുടിച്ചു കൂത്താടി
ജീവന്റെ അതിരുവെട്ടിച്ച്‌
അവനെ തൂക്കിയിടുന്നു.

പീറ്റർ തൂങ്ങിമരിച്ചു.

വലിയ ആംബുലൻസിൽ
കദനവാഹനങ്ങളുടെ അകമ്പടിയോടെ
വീട്ടിലേക്കു കയറി
മേരിയുടെ ജീവിതത്തിനു മുമ്പിൽ
പീറ്റർമോൻ കിടന്നു

അച്ചന്മാർ അയൽക്കാർ
ബന്ധുക്കൾ
വരണ്ടുപോയ തന്റെ മാതൃത്വം
എല്ലാം അലംകൃതമായ ഒരു കേക്കിന്റെ രൂപത്തിൽ
മേരിയുടെ മനസ്സിലുണ്ട്‌
ആകാശത്ത്‌ പീറ്ററിന്റെ ചില്ല കിടക്കുന്നതും
ചിതറിയ പക്ഷികൾ വീണ്ടുമൊന്നിച്ചു പാടുന്നതും
ഓർത്ത്‌
ആകാശത്തിന്റെ അരികുപറ്റി മേരി പോകുന്നു

അവൾക്ക്‌ ആകാശം മാത്രം.

രണ്ടല്ലോ തിര

2008-06-07T00:49:00.000-07:00

ജലത്തിൻ അളവുകൾ
പഠിക്കാൻ ചമ്രംപടി-
ഞിരിക്കും ഗണിതജ്ഞ സായാഹ്നം.
ശ്വാസോച്ഛാസം.

സാഗരം മറയ്ക്കുന്നു
സൂര്യനെ മറയ്ക്കുന്നു
കാണ്മു നാമൊരാളുടെ ഗുണനം
നയനങ്ങൾ.

വന്നല്ലോ ഒരു തിര
പിന്നെ രണ്ടല്ലോ തിര
എന്നെത്ര ചാഞ്ചാടുന്നു-
ണ്ടുണ്ണിക്കൈവിരലുകൾ!

മൂവാറുപതിനെട്ടുതിരകൾ ചിരിക്കൊപ്പം
മുപ്പത്തിമുക്കോടിയിലെത്തുമ്പോൾ നടുക്കങ്ങൾ
ഭിന്നമല്ലാതിപ്പരിപൂർണ്ണസംഖ്യകളുടെ
വന്ദനം ആർക്കെന്നോർത്തൊരത്ഭുതപ്പെരുക്കങ്ങൾ

ശംഖുകൾ കടൽപ്പന്നി കൊമ്പൻസ്രാവൊ, രാമതൻ
ചങ്കിടിപ്പിലും താളം തുള്ളുന്ന നിനവുകൾ
സർപ്പദംശനഭയം. സപ്താഹം. സദ്യ. ദാനം.
ചത്തുപൊന്തിയ പരീക്ഷിത്തിന്റെ ഗ്രഹനില
'ഫുൾസ്റ്റോപ്പു' പോലെ വിശ്വ-
പ്രളയമിടയ്ക്കിടക്ക്‌.
അത്രയും തിരയുടെയെണ്ണത്തിൽ കലരുന്നു.

സംഖ്യയിൽനിന്നും സത്യം
പങ്കജം
സുദർശനം
സംഭവിപ്പത്‌
ഭക്തവാർദ്ധകം
ഗണിക്കുന്നു

സാഗരം തെളിയുന്നു
സൂര്യനും തെളിയുന്നു
കാണ്മുനാമയാളുടെ ദഹനം
കാകാരവം

ജലത്തിൻ അളവുകൾ
പഠിക്കാൻ ചമ്രംപടി-
ഞിരിക്കും ശ്വാസം.
ജഡം.
കപാലം.
ചിതാഭസ്മം

തട്ടിൻമുകളിൽ രണ്ടും

2008-06-07T00:35:00.000-07:00

എന്റെ വീട്ടിൽ ഖുറാൻ
അബ്ദുവിന്റെ വീട്ടിൽ രാമായണം

തട്ടുമുട്ടുപാത്രങ്ങൾക്കും വിറകിനുമിടയിൽ
പൊടിയണിഞ്ഞ്‌
തട്ടിൻമുകളിൽ രണ്ടും.

ഞാൻ ഹിന്ദുവും അവൻ മുസൽമാനും
ആയിത്തുടരുന്നതും
അതുകൊണ്ടുതന്നെ.

അവയെങ്ങാനും വായിക്കപ്പെട്ടിരുന്നെങ്കിൽ
കാതലായ മാറ്റങ്ങൾ ഉണ്ടാവുമായിരുന്നു

ഞാൻ ഇസ്ലാംമതം സ്വീകരിക്കും
അവൻ ഹിന്ദുമതവും.
തീർച്ച.

അത്രക്ക്‌ മഹത്തായ
സനാതന സത്യങ്ങൾ
ഉൾക്കൊള്ളുന്ന ഗ്രന്ഥങ്ങൾ
ഉരുണ്ടുവീഴാത്തതേ ദൈവകൃപ.

ബുദ്ധിമാനായ ആ പെരുച്ചാഴി
ഒരു വലിയ പട്ടികക്കോൽ
പുസ്തകങ്ങൾക്കു കുറുകേ കെണിച്ചുവെച്ച്‌
വർഗ്ഗീയ ദുരന്തങ്ങൾ
ഒഴിവാക്കുകയായിരുന്നു.

ബ്രഹ്മം

2008-06-07T00:05:00.000-07:00

ഭിന്നമാണതിൻ ലോകം

കാഴ്ച്ചയിൽനിന്നും വിരൽ-
സ്പർശത്തിൽനിന്നും നാസാ-
ഗന്ധത്തിൽനിന്നും നാവിൻ
രുചിയിൽനിന്നും
ഏറെ
ഭിന്നമാണതിൻ ലോകം.

ഭിന്നമാണതെങ്കിലും
നമ്മുടെയരികത്തെ-
ച്ചെള്ളുനായയെപ്പോലെ
ചടഞ്ഞുകൂടാൻമാത്രം
ഭിന്നതവരാനെന്തുകാരണം?

അറിയുമൊ?

എന്തിൽനിന്നാണീ ഭിന്ന-
വ്യക്തിത്വമതാർജ്ജിച്ചു?
ഏതിനെ മറക്കുവാ-
നെപ്പോഴുമോർമ്മിപ്പിച്ചു?

എന്തു തിന്നുവാൻ
വേണ്ടി
തൻ ധർമ്മമുപേക്ഷിച്ചു?
എന്തിന്റെ നിഴൽകൊണ്ടു-
നൊന്തുവായൊലിപ്പിച്ചു?

എന്തിനീ സ്വയംകൃത
രൂപഭേദത്താലൊന്നും
മിണ്ടാതെ
അനങ്ങാതെ
നമ്മളെക്കാത്തീടുന്നു?

ഭിന്നമാണതിൻ ലോകം
ബ്രഹ്മമെന്നതിൻ നാമം
തങ്കനിർമ്മിതം പെരും ചങ്ങലത്തുമ്പിൽ ശൗര്യം.

അനങ്ങാതെ

2008-06-06T23:52:00.001-07:00

രാത്രി.
തൊട്ടടുത്ത്‌ പകൽ നിൽപ്പുണ്ട്‌.

ഞാനും വീടും പുഴയും
ദു:ഖങ്ങളുമെല്ലാം
രാത്രിയിലാകുന്നു

പകലിൽ ഒരു പൂ മാത്രം.

വിടർന്ന്
പ്രണയിച്ച്‌
കൊഴിയുന്ന
അതിന്റെ ഗന്ധവും.

കടൽ.
അതിനപ്പുറത്താണ്‌ രാത്രി

അവിടെയാണ്‌
ഞാൻ വീട്‌ പുഴ എല്ലാം

പകൽ തൊട്ടടുത്ത്‌
അനങ്ങാതെ
നിൽപ്പുണ്ട്‌.

ഉയരം

2008-06-06T03:37:00.000-07:00

1.

ജനലിനേക്കാൾ ഉയരമുള്ള തടവുകാരനുണ്ട്‌.

രാവിൽ
അവൻ
മേൽക്കൂരയ്ക്കു മുകളിലൂടെ
ബാഹ്യലോകം കാണും
പൂമരങ്ങൾ പിടിച്ചു കുലുക്കും
കടലിനെ വിക്ഷുബ്ധമാക്കും
പർവതങ്ങൾ ഫണം താഴ്ത്തും

അവന്റെ കുറ്റങ്ങൾ എവിടേയും തുടരും

അധികാരികൾ റോന്തുചുറ്റുമ്പോൾ
അവനൊരു ഉറക്കബിന്ദു

പാതിരായ്ക്ക്‌
ഉയരം ഇറങ്ങി നടക്കുന്നു.
പള്ളികളുടെ
വീടുകളുടെ
നായ്ക്കളുടെ
കൂണുകളുടെ
ചിലന്തികളുടെ
ഉയരങ്ങളായി പിരിഞ്ഞ്‌

ഭൂമിയിൽനിന്ന് മുകളിലേയ്ക്കുള്ള
എന്തും
ഉയരമാകുന്നു

ചന്ദ്രന്റെ ഉയരം
നക്ഷത്രങ്ങളുടെ ഉയരം
ഉയരങ്ങൾകൊണ്ട്‌ നമ്മുടെ നാവ്‌ കുഴഞ്ഞുപോകുന്നു

സൂര്യന്റെ ഉദയം
ഭ്രാന്തു പിടിപ്പിക്കുന്നു.

2.

പകലിനേക്കാൾ ഉയരമുള്ള
തടവുകാരനുണ്ട്‌

ജയിൽവളപ്പിൽ ചെടി നടുന്നവൻ
പത്രം വായിക്കുന്നവൻ
കത്തുകളെഴുതുന്നവൻ
നീതനായി
തന്റെ കഞ്ഞിയും പയറും
അവൻ കഴിക്കും

മുടിപറ്റേ വെട്ടിയും
നേർമീശവെച്ചും
കൂട്ടാളരോട്‌ സമരസപ്പെടും.

ഉച്ചക്ക്‌ തറയിലൊരു മയക്കം
സന്ധ്യയ്ക്ക്‌ സാഷ്ടാംഗ നമസ്കാരം

പ്രപഞ്ചത്തിൽ ഇടപെടാതെ
അഹിംസയുടെ മൂർത്തി
നീളംമാത്രം നൂൽക്കും

ഭൂമിക്ക്‌ മുകളിലുള്ള അവൻ
ഉയരമാകുന്നു.

അപസ്മാരം

2008-06-06T03:01:00.000-07:00

അന്നും കടലിനടിയിലെ സ്രാവുകൾ
അന്തരീക്ഷത്തിൽ നിരന്നു
'കിംഗ്‌ഫിഷർ പൊന്മ' യെന്നർത്ഥംപറയുന്ന
കുഞ്ഞുങ്ങൾ തുള്ളിക്കളിച്ചു.

പൊന്തും ജലത്തിൽ കുളിക്കുവാൻ പേടിക്കും
പെണ്ണ്‌ ജനാലയ്ക്കൽ വന്നു
പിന്നിൽവന്നാരുമറിയാതൊരാൾ മുടി
പിന്നിയതോർത്തവൾ നിന്നു

ചെങ്കഴുകന്റെ ചിറകായിയാകാശ-
മന്തമില്ലാതെ കിടന്നു
എങ്കിലും കണ്ണീരുമാത്രം കുടിച്ചവ-
ളുമ്മയിലെല്ലാം മറന്നു

മുങ്ങും മുറിയെയിലന്നേഴാം നിലയിലെ-
ച്ചന്ദ്രനെ രാഹു കവർന്നു
വൻതിരമാലച്ചുഴിയിലെക്കന്യക-
തൻ ജഡം മീനുകൾ തിന്നു

അന്നും കടലിന്നടിയിലെ സ്രാവുകൾ
അന്തരീക്ഷത്തിൽ നിരന്നു
'കിംഗ്‌ഫിഷർ പൊന്മ' യെന്നർത്ഥംപറയുന്ന
കുഞ്ഞുങ്ങളാർത്തുകരഞ്ഞു.

മുളയൻ

2008-06-05T10:03:00.000-07:00

മുളകൾ
താനേ പാടുമെന്ന്‌
ഞാൻ കേട്ടിട്ടുണ്ട്‌
പാട്ടുകേട്ടിട്ടില്ല
കാറ്റത്ത്‌ ആടുന്നതേ കണ്ടിട്ടുള്ളു

ഉച്ചകഴിഞ്ഞ്‌
തൊടിയിൽ
എല്ലാ ജീവജാലങ്ങളും
മയങ്ങുന്ന നേരം
ഒരു സാധനം മാത്രം
ഇഴഞ്ഞുവന്ന്‌
മുളകൾക്ക്‌ കീഴെ ചുരുണ്ട്‌
പത്തിവിടർത്തി
ആടുന്നതുകണ്ടിട്ടുണ്ട്‌

മുളങ്കൂട്ടമപ്പോൾ നിശ്ചലം

അന്തിക്ക്‌
കറുത്തൊരാൾ
ചേറ്റിൽ നീന്തി
മുളഞ്ചോട്ടിലെത്തി
ഒരെണ്ണം മുറിച്ച്‌
അളന്നു തുളകളിട്ട്‌
ചുണ്ടോടടുപ്പിച്ച്‌ ഊതും

ആവിളി
അന്യരാജ്യങ്ങളിലും
ഒലികൊള്ളും
സംഗീതക്കടലിൽ
മുളയന്റെ
പള്ളിനിദ്ര

രാവുമുഴുവൻ
മൂന്നാംലോകത്തെ
മുളകളുടെ ആട്ടം.

ഭൂകമ്പരാമായണം

2008-06-05T09:39:00.000-07:00

ചരിത്രം അവസാനിച്ചു
കാലം സ്ഥലം വിട്ടു.

കഴുത്തിനു കീഴ്ഭാഗം എവിടെയാണ്‌?
തലയ്ക്കുമുകളിൽ ആകാശമാണ്‌
ഹെലികോപ്റ്റർ പോയി

അലമുറ തീർന്നത്‌ മൂന്നുനാൾ മുമ്പാകാം

ആംബുലൻസുകളും
പട്ടാളവും
ക്രെയിനുകളും
ഒഴുകിവന്നത്‌
ഡെറ്റോളിന്റെ ഭരണത്തിൽ
മുങ്ങിപ്പോയി
കണ്ണുനീർ ഭീകരമായി
ഒറ്റപ്പെട്ടു

അതിനൊക്കെ വളരെ മുമ്പാണ്‌
നീതുവിന്‌ കണക്ക്‌ പറഞ്ഞു കൊടുത്തത്‌
സീരിയൽ മാറ്റി ഡിസ്കവറിചാനൽ വെയ്ക്കാൻ
സപൻ
വാശിപിടിക്കുന്നുണ്ടായിരുന്നു
അടുക്കളയിൽ സീത
കാര്യമായതെന്തോ
ഉണ്ടാക്കിയിരുന്നിരിക്കും

മുന്നറിയിപ്പില്ലാതെ
നാലിടത്തുനിന്നും
ചുമരുകൾ ചാടിവന്നു
ഹോളി നേരത്തെ എത്തിയോ?
ഇത്രയെങ്കിലും ഓർമ്മ നല്ലത്‌
വായിൽ ഒരിഷ്ടിക പാർപ്പിടമുറപ്പിച്ചുകഴിഞ്ഞു!

ഒരു പട്ടി അതാ പോകുന്നു
അതുകൊണ്ട്‌
ഇപ്പോൾ എല്ലാവരും അടിയിലുണ്ടാകുമെന്ന്‌ കരുതാം.

ജീവനുണ്ട്‌ എന്ന സങ്കൽപ്പം തന്നെ
എത്ര ഉദാത്തം!

എന്റെ പേർ ഞാൻതന്നെ ഊഹിച്ചെടുക്കട്ടെ

ഇടശ്‌ശേരി

2008-06-05T06:38:00.000-07:00

അടയ്ക്കാൻവയ്യാത്ത കവിതച്ചൂടുമായ്‌
അടുപ്പത്തുണ്ടാരോ തിളച്ചു.

ഇടശ്‌ശേരി
കലം കവിഞ്ഞുപോകുന്നു.

നറും നർമ്മത്തിന്റെ
പൊടിയരി വേവും
മുലപറിച്ചൊരു മുളകിന്റെ
വീറും
ഒരുതരിയുപ്പിൽ
കടലൊരുക്കത്തിൻ
കഥകളിമുദ്രയൊളിപ്പിച്ച
വാക്കും കടന്ന്.

ഇടശ്‌ശേരി
കലം കവിഞ്ഞുപോകുന്നു.

നെടുകെ
മീനായി എടുത്തു ചാടുന്നു
കുറുകെപ്പാലങ്ങൾ
കുലച്ചുനീർത്തുന്നു

ജലത്തിൻ
വിഭ്രാന്തതലം
പിടയ്ക്കുന്നു

സ്ഥലത്തിലാരുടെ മിടിപ്പ്‌?

നിളയ്ക്കു മേലാരും
ഇനി നോക്കാൻ വയ്യ
ഇളക്കം കണ്ടാരും
ഭയക്കാനും വയ്യ

നിലം തൊടാതുള്ള
നിലാവിനെക്കണ്ട്‌
ഇടിവെട്ടിത്താഴെപ്പതിക്കാനും വയ്യ

ഇടശ്‌ശേരി
കലം കവിഞ്ഞു
പോകുന്നു

ചെറുപുള്ളികൾ

2008-06-05T06:20:00.000-07:00

ചെറുപുള്ളികൾ
ചെറുപുള്ളികൾ
മേയുന്നവ കാടുകളിൽ
നീൾമിഴിയും
കവരമെഴും
കൊമ്പുകളും കുമ്പിടുവോർ

ചെറുപുള്ളികൾ
ചെറുപുള്ളികൾ
പുലിയുടലിന്നോമനകൾ
തിരമാലച്ചാട്ടക്കാർ
മായുന്നവ
കാടുകളിൽ.

പാളിയ മർദ്ദനം

2008-06-05T05:35:00.000-07:00

മർദ്ദനം പാളി

ഒരു വിഷത്തുള്ളിയെ
ഒരു മഷിത്തുള്ളിയാൾ
എങ്ങനെ
പ്രാപിക്കും?

എത്രകാലം
ഒരു നിറത്തോട്‌
ഒരേനിറമിങ്ങനെ
നിൽക്കാതെ പോരാടും?

സർപ്പഭ്രമത്തെ -
യറിഞ്ഞുചവിട്ടിയാൽ
ഒറ്റത്തളയും കിലുങ്ങില്ല
കുഴൽത്തുള മിണ്ടില്ല
നിറകുടം തൈരുപോ-
ലുടലുള്ള പെണ്ണുങ്ങൾ
മഥുരയിൽപ്പോലും
കടഞ്ഞുമൂർച്‌ഛിക്കില്ല

എന്തിനീ നിഷ്‌കളമിഥ്യാജലത്തിനെ
യിങ്ങനെ ബാല!
തളയ്ക്കാൻ ശഠിയ്ക്കുന്നു?

നിന്നെ വരിഞ്ഞുമുറുക്കുന്നതൊക്കെയും
നിന്റെ വാൽതന്നെയെന്നറിയുന്നത്‌ ഗീത.

എന്തൊക്കെയായാലും
ക്യാമറയന്നു പകർത്തിയ
കാളിയ മർദ്ദനം
പാളി.

മനോധർമ്മം

2008-06-05T05:22:00.000-07:00

ജനനം മുതൽ മരണം വരെ
മനുഷ്യശരീരത്തിലുണ്ടാവുന്ന
ഓരോമാറ്റവും
എന്റെ മകൾ ഞങ്ങളുടെ മുൻപിൽ
അഭിനയിച്ചു കാണിച്ചു

കമിഴ്‌ന്നു നീന്തുന്നത്‌
സ്കൂളിൽ പോകുന്നത്‌
രാത്രി വായിക്കുന്നത്‌
പൊക്കം വെയ്ക്കുന്നത്‌
ദാവണി ചുറ്റുന്നത്‌
താലി കെട്ടുന്നത്‌
പ്രസവിക്കുന്നത്‌
(ആ കുഞ്ഞിന്റെ വളർച്ചയുടെ ഘട്ടങ്ങൾ വേറെയും)

മുടിനരയ്ക്കുന്നത്‌
ശരീരം ഇടിയുന്നത്‌
തൊലി ചുളിയുന്നത്‌
ചക്രം നിലയ്ക്കുന്നത്‌
കൂനുന്നത്‌
കുരക്കുന്നത്‌
ചത്തുകിടക്കുന്നത്‌
കത്തിപ്പിടിക്കുന്നത്‌
മക്കളും ബന്ധുക്കളും
നിരന്നു നിൽക്കുന്നതും
ആൾക്കാർ പെരുകുന്നതും
ഒക്കെ
ആ കൊച്ചുശരീരംകൊണ്ട്‌
അവൾ സാധിച്ചു.

ഞങ്ങൾ എട്ട്‌ അംഗങ്ങൾ
വീടിന്റെ ഉമ്മറത്ത്‌.
ഞങ്ങളുടെ കണ്ണുകൾ
തൊട്ടുതൊട്ടു നിൽക്കുന്നുണ്ട്‌
മുറ്റത്തെ മീൻചെതുമ്പൽ പോലെ.

കൊട്ടും പാട്ടും കൂടാതെ
ഞങ്ങളുടെ കുടുംബത്തിലെ
ഒരു കുരുന്ന്
ഏതു തലമുറയിലും
ഈ മനോധർമ്മം
ചെയ്തുകാട്ടിയിട്ടുണ്ട്‌.

പാരമ്പര്യം
അതാണ്‌ കലയുടെ ഉറവിടം

സന്ധ്യയ്ക്ക്‌
ഒരു ഭീമൻ നിലവിളക്ക്‌
ഭാര്യ തെളിച്ചുവെച്ചു

അതും മകൾ അഭിനയിച്ചു കാണിച്ചു.

ശ്രീ

2008-06-05T02:56:00.000-07:00

'ഇതിലുണ്ടൊരാൾ'
നിൻമൊഴിചൂണ്ടുന്നൂ പാറ.
അരികിൽ
ചിരിയുടെ ഭൂതങ്ങൾ
ഞാനും കാറും.

നമ്മുടെ മധുവിധുവണ്ടിയീക്കർണ്ണാടക
നൻമകൾവകഞ്ഞിത്ര വന്മലവരെയായോ?
വാച്ചു ഞാൻ നോക്കിപ്പോയി.

'താങ്കൾകേൾപ്പീലേ രാഗം?'
'കരുണചെയ്‌വാനെന്തുതാമസം'
ശിലയിൽ കാതും ചേർത്ത്‌
എന്നെ നീ
വീണ്ടും വീണ്ടും ക്ഷണിച്ചു.

ഉൾത്താപത്തിലുരുകും കരിങ്കല്ലി-
ലെന്തെല്ലാമാരോപിച്ചു?

ചിരിയുടെ ഭൂതങ്ങൾ
ഞങ്ങൾ നീങ്ങി
നിന്നെയും കൊണ്ട്‌

പിന്നോട്ടു തിരിയാത്തയാത്രയിൽ സരസ്വതി
പിന്നിലുണ്ടെന്ന യുക്തിയെന്നോടു പറഞ്ഞു നീ
കണ്ണിലെ മൂകാംബികയാം മഹാദൂരത്തിനെ
മിന്നുന്ന ബീഡിത്തുമ്പാൽ മൂക്കുത്തിയണിയിച്ച്‌
ഉമ്മകളുറക്കങ്ങളുലയാതിരിക്കുവാൻ
നമ്മുടെ ഡ്രൈവർ ചക്രംപിടിച്ച്‌ ധ്യാനിക്കുന്നു
ജലത്തിൽ രത്നം പോയപോലെ നാമുറങ്ങുന്നു
രഹസ്യം തേടുന്നപോൽ 'മാരുതി' പറക്കുന്നു
അപ്പൊഴും രാവിൽചുറ്റും
അത്ഭുതവാച്ചിൻതണു-
പ്പത്രയെൻ കയ്യിൻ നാഡി-
മിടിപ്പിൽ കലർന്നല്ലോ?

നുരച്ചുപതയുന്ന ചന്ദ്രനുമുണ്ടൊറ്റയ്ക്ക്‌

ചിരിയുടെ ഭൂതങ്ങൾ
ഞങ്ങൾ നീങ്ങി
നിന്നെയും കൊണ്ട്‌

'ഇതിലുമുണ്ടാമോ ഒരാൾ?'
വിചിത്രവെയിൽവീണുതുടുത്ത ശവം ചൂണ്ടി
വിശുദ്ധപരിഹാസം ചോദിച്ചു നിന്നോടാരോ?
ഈച്ചയും ദുർഗന്ധവുമാർക്കുന്നയാഥാർത്ഥ്യം നിൻ
നേർക്കെറിയുവാൻ സൂര്യൻ കയ്യുകളോങ്ങീ ചുറ്റും
പോലീസുതിരിച്ചിട്ടു മുഖത്തെ.
സംഗീതത്തിന്നോളക്കുത്തുകൾ
മണത്തു നീ നായെപ്പോലെ.

'ഇവനാണിരയിമ്മൻ ഉയിരിൻ ശ്രീരാഗത്താൽ
കരുണചെയ്യനെന്തുതാമസമെഴുതിയോൻ'
രക്തഹീനരായ്പ്പോയജനത്തെ ചിലമ്പുട-
ച്ചുഗ്രമാം പെൺശബ്ദത്താലുണർത്തി നീ ചൊല്ലുമ്പോൾ
മഹസ്സറെഴുതിയ പോലീസുകാരൻ ഞെട്ടി
പരസ്യം കരിമഷിപ്പേനയാൽ കുറിച്ചിട്ടു

ഇടയ്ക്കു വലംകയ്യിലരിച്ച സമയത്തി-
ലുടക്കിയെൻ കണ്ണിണ. രാത്രിതൻ നടുക്കടൽ.
പിടിച്ച മുയലിന്റെ മൂന്നുകൊമ്പുകൾ മീട്ടി
മിടുക്കി നീയുന്മാദിയങ്ങനെയിരിക്കുമ്പോൾ
രണ്ടുപേർനമ്മൾ ഒരേ കിനാവുകാണുന്നതു
കണ്ടുവണ്ടിയും തൃശ്‌ശൂർ ഹൈവേയും പായുന്നല്ലോ?

വെളിച്ചം വരുംവരെ
നമ്മുടെ ഡ്രൈവർമാത്ര-
മൊളിച്ചുവെച്ചൂ
ദന്തപൂർണ്ണമാം ചിരികളെ.

ദേശീയത അഥവാ ദേശീയത

2008-03-09T05:55:00.000-07:00

കുറവിലങ്ങാട്ടു പിറന്നവന്റെ
കരച്ചിലും
ഹിമാലയത്തില്‍ത്തട്ടി.

മൂത്രവും മലവും
മൂന്നുകടലുകളില്‍ ചേര്‍ന്നു.

വളര്‍ന്ന് വടക്കോട്ടുപോയി
സ്വറ്ററിട്ട്‌ തിരിച്ചുവന്നു.

പിന്നീട്‌
ആരുമരിക്കാന്‍ കിടന്നാലും
പുണ്യജലമെന്നുപറയപ്പെടുന്ന
ഒരു ദ്രവം
നാവില്‍ ഇറ്റിച്ചിരിക്കും കക്ഷി.

മടക്കയാത്രയില്‍
കൊല്‍ക്കത്തയില്‍വച്ച്‌
കുതിരവണ്ടിക്കടിപ്പെട്ടു.

ഭസ്മരൂപിയായി
വീട്ടില്‍വന്ന്
അമ്മയുടെ കണ്ണീരുകാണാന്‍
മറന്നില്ല.

ചെറിയ ജീവിതത്തിനിടയിലും
നടന്നുനടന്ന്
അവന്റെ കാല്‍പ്പാടുകള്‍
ഒരിന്ത്യാചിത്രം
ഏതാണ്ടു പൂര്‍ത്തിയാക്കിയിട്ടുള്ളതായി
റിപ്പോര്‍ട്ടുണ്ട്‌

കമ്യൂണിസ്റ്റുമായിരുന്നു.

കൃഷ്ണഘടന

2008-03-09T05:39:00.000-07:00

ഘടനയറ്റൊരു രാത്രിയില്‍
ശ്രീകൃഷ്ണഘടന കൊത്തുന്നുവോ
നിന്റെ കയ്യുകള്‍

മുടിയിലെപ്പീലിമുറ്റിത്തഴപ്പതും
തിരുലലാടം തീര്‍ന്നുപൊന്തുന്നതും
മിഴികള്‍രണ്ടിലും താമരവന്നതും
ഒരുതിരവന്നുമൂക്കൊത്തുയര്‍ന്നതും
കുഴലൊടൊത്തിരുചുണ്ടുവിടര്‍ന്നതും
ഇടിമുഴക്കത്തൊടൊപ്പം കഴുത്തതും
കടലില്‍നിന്നുടല്‍ കേറിവളര്‍ന്നതും
പ്രളയമേ,യെന്നുവാഴ്ത്തി നീ നിന്നതും
ഘടനയറ്റൊരു രാത്രിയില്‍.

ശ്രീകൃഷ്ണഘടന കൊത്തുന്നുവോ
നിന്റെ കയ്യുകള്‍

ഉളിയിലെശ്ശബ്ദരാത്രികൊണ്ടീമന-
സ്സിളകിനില്‍ക്കുന്നു.

നിന്റെ വിയര്‍പ്പിന്റെ
തെരുതെരെക്കാറ്റ്‌
അരൂപത്തില്‍ നീചെയ്ത
കഠിനമാം കയ്യ്‌.
അതെന്നെ വിളിക്കുന്നു

'മുടിയിതു കല്ല് പീലിയും കല്ലല്ലോ
മുഖവും ഗാനവും പ്രേമവും കല്ലല്ലോ
മുതിരും രൂപമരൂപവും കല്ലല്ലോ
മതിവരാത്തൊരീ രാത്രിയും കല്ലല്ലോ'

തിരകളിങ്ങനെ പാടുന്നതോടൊത്ത്‌
കരവരെക്കേറി നില്‍ക്കുന്നു ശ്രീകൃഷ്ണന്‍
ഉരുവില്‍ കല്ലുളി വീഴുന്നതോടൊത്ത്‌
ഉരുവമാകാന്‍ കൊതിക്കുന്നു ശ്രീകൃഷ്ണന്‍

മുടിയിലെപ്പീലി കൊത്തുന്നനേരത്തെ
ഘടന
നെറ്റിയില്‍
മൂക്കില്‍
മിഴികളില്‍
കുഴലിലൊച്ചയില്‍ കര്‍മ്മത്തില്‍ കാമത്തില്‍
സകലസത്തിലും വീണു കല്ലിയ്ക്കുന്നു.

സഫലമാകുന്നു ശില്‌പിയും
ശ്രീകൃഷ്ണഘടന കൊത്തുന്ന
രാത്രിസങ്കല്‍പ്പവും.

വസ്തുക്കളെപ്പറ്റി പറയുകയാണ്‌

2008-03-09T05:11:00.000-07:00

ഞാന്‍ നിന്നോട്‌ വസ്തുക്കളെപ്പറ്റി പറയുകയാണ്‌.

കല്ല് കസേര തീപ്പെട്ടി ഫ്രിഡ്ജ്‌ കന്മദം
പുസ്തകം വിളക്ക്‌ ചുറ്റിക കപ്പ്‌ തോര്‍ത്ത്‌
കമ്പി ടെലിവിഷന്‍ ചിലമ്പ്‌ ടോര്‍ച്ച്‌ ചട്ടുകം
സൂചി ജാലകം തപാല്‍പ്പെട്ടി ഭരണി സോപ്പ്‌
വില്ല് പിഞ്ഞാണം ലോട്ട കണ്ണട വീണ
............................................
ജീവിതം മുഴുവനും വസ്തുക്കളെപ്പറ്റി പറഞ്ഞിട്ടും തീരുന്നില്ല.
അവ അതാതിടങ്ങളില്‍ത്തന്നെ തുടരുന്നു.

ആരുമൊന്നും എടുത്തുമാറ്റിയിട്ടില്ല.
എല്ലാം പുറത്ത്‌.
അടുത്തും ദൂരത്തും .

വളവു തിരിയുമ്പൊഴും ആഴത്തിലേക്കു പോകുമ്പോഴും
നടന്നിട്ടും പറന്നിട്ടും, അവസാനിക്കാത്തവസ്തുക്കള്‍

ഞാന്‍ നിനക്കുവേണ്ടി എല്ലം ഒരു ചിമിഴിലടക്കിപ്പറയാന്‍
ശ്രമിച്ചു പാളി.
പുതിയവ തുറിച്ചുവരുന്നതുകണ്ട്‌ നിന്റെ പരിഹാസം.

എനിക്ക്‌ ശ്വാസം കിട്ടാതായപ്പോള്‍
നീ പറഞ്ഞുതുടങ്ങി.

ക്ലോക്ക്‌ കണ്‍മഷി അഗസ്ത്യരസായനം കയര്‍
പൂണുനൂല്‍ ഫ്ലോപ്പി കിടയ്ക്ക പറ
സോഡാമേക്കര്‍ തലയോട്‌ അഞ്ജനം ചൂരല്‍വടി
തോക്ക്‌ പേഴ്സ്‌ തൊട്ടി ടെലസ്കോപ്പ്‌

നിന്റെ നാവും നിലയ്ക്കുന്നില്ല
എന്റെ നാവും നിലയ്ക്കുന്നില്ല

ദൈവത്തിന്റെ സ്മരണപോലെ
വസ്തുക്കള്‍ എങ്ങും
വ്യാപിച്ചുകിടക്കുന്നു.

വസ്തു പ്രളയം.
പ്രളയവസ്തു.

അവസാനമായി ഒന്നുചുംബിച്ച്‌
നാമത്‌ ആഘോഷിച്ചു

പേരുകള്‍

2008-03-09T04:11:00.000-07:00

നീരോട്ടം കൃഷ്ണന്‍കുട്ടി
നീന്തല്‍ നാരായണപിള്ള
ചെറുമീന്‍ കാര്‍ത്തു
ചുഴിക്കുത്ത്‌ പൊന്നമ്മ
വളഞ്ഞൊഴുക്ക്‌ ബാലഗോപാല്‍
തരംഗഫേനം ശിശുപാലന്‍ കര്‍ത്താ
വെള്ളപ്പൊക്കത്തില്‍ സലിം
എന്തൊരാഴം. കെ. കുറുപ്പ്‌
കാല്‍വഴുതി ബഞ്ചമിന്‍
തോണി സുബ്രു

പുഴക്കൊപ്പം ഒലിച്ചുപോയ മനുഷ്യപ്പേരുകള്‍!

പാലത്തിലൂടെ
ആലുവായ്ക്ക്‌ സൈക്കിള്‍ ചവിട്ടുമ്പോള്‍
ഇവരെയോര്‍ക്കും ഞാന്‍

തീരമണല്‍
ചൂണ്ടുവിരല്‍
വിക്ഷുബ്ധമനസ്സ്‌
ഇവ ഘടിപ്പിച്ച
ആ ഒറ്റയന്ത്രവുമായി
ചിന്തയില്‍നിന്ന് തിരിച്ചുവരും
ദിവസവും രാത്രി.

അവരുടെ മരണത്തെപ്പറ്റി
ഓരോ കഥകളെഴുതാന്‍ ഉറച്ച്‌.

മേഘപഠനങ്ങള്‍

2008-03-09T04:09:00.001-07:00

1

മേഘങ്ങള്‍
പലപ്പൊഴും
പ്രത്യക്ഷപ്പെടാറുള്ള
പോര്‍മൃഗക്കൂട്ടം

കാറ്റുചെന്നവയുടെ
തേറ്റയും നഖങ്ങളും
തൊട്ടുനോക്കുന്നു

വായതുറന്നു പല്ലെണ്ണുന്നു.

2

മേഘങ്ങള്‍
പലപ്പൊഴും
സ്വപ്നത്തില്‍പ്പെടാറുള്ള
കാമുകീശില്‌പം

കാറ്റുചെന്നവളുടെ
കാതിലും കരളിലും
പാട്ടുമൂളുന്നു

ചേലകവര്‍ന്നു പറക്കുന്നു.

3

മേഘങ്ങള്‍
പലപ്പൊഴും
സമരം നയിക്കുന്ന
വിപ്ലവാവേശം

കാറ്റുചെന്നവരുടെ
കയ്യിലും
കൊടിയിലും
ചോപ്പു കൂട്ടുന്നു

കോപമെടുത്തുജ്വലിക്കുന്നു.

4

മേഘങ്ങള്‍
പലപ്പൊഴും
കുട്ടികള്‍ കൂത്താടുന്ന
കോട്ടമൈതാനം

കാറ്റുചെന്നവരുടെ
പന്തുബാറ്റുകള്‍
തട്ടിത്താഴെ വീഴ്ത്തുന്നു

മഴതൂളിച്ചുതുവര്‍ത്തുന്നു

5

മേഘങ്ങള്‍
പലപ്പൊഴും
വൃദ്ധന്മാര്‍ വലിക്കുന്ന
ശ്വാസനിശ്വാസം

കാറ്റുചെന്നവരുടെ
വീട്ടിലും വഴിയിലും
കൂടിനില്‍ക്കുന്നു

ചിത കത്തിച്ചു പിരിയുന്നു.

6

മേഘങ്ങള്‍
പലപ്പൊഴും
ദൈവങ്ങള്‍ വരാറുള്ള
രാത്രിസങ്കേതം

കാറ്റുചെന്നവയുടെ
കാല്‍തൊട്ടു മുടിയോളം
കൂപ്പിനില്‍ക്കുന്നു

എല്ലാം പറഞ്ഞുകരയുന്നു.

7

മേഘങ്ങള്‍
പലപ്പൊഴും
പാഠങ്ങള്‍ ശഠിക്കുന്ന
ഗ്രന്ഥകാര്‍ക്കശ്യം

കാറ്റുചെന്നവയുടെ
ഏട്ടിലും വരിയിലും
തോട്ടവെയ്ക്കുന്നു

കീറിപ്പറിച്ചു ചിരിക്കുന്നു

കേരളോല്‍പ്പത്തി

2008-02-24T02:30:00.000-08:00

പരശുരാമന്‍ മഴുവെറിഞ്ഞില്ല

വയസ്സായി
വിറകയ്യൂര്‍ന്നുവീണിടം
ആറിഞ്ച്‌ ഭൂവില്‍
അയാളുടെ ചിത

ഇടവപ്പാതിയും
തിരുവോണവും
കുഞ്ചന്‍നമ്പ്യാരും
ചങ്ങമ്പുഴയും
ഈയെമ്മസ്സും
മനോരമയും
കടലില്‍
കുറച്ചുമാറി
ഒത്തുകൂടി
തിരയടിച്ചു പിരിഞ്ഞു

പ്രകൃതം

2008-02-24T02:19:00.000-08:00

തുറന്ന പ്രകൃതമാ-

ണച്ചെറുകഥയ്ക്കെന്നും

അവിടെ സുരേന്ദ്രനെ-

ന്നുള്ളൊരാള്‍ സാവിത്രിയെ-

ത്തുറന്നു പ്രേമിക്കുന്നു

അവളും അതുപോല

തുറന്ന കളിവഞ്ചി

കയറിത്തെളിവാനം

നിറഞ്ഞ പൂര്‍ണ്ണേന്ദുവെ-

ത്തുടര്‍ന്നു പിന്‍പേപോകും

നിലാവും കാറ്റും രാവും
തുറന്ന മനസ്സാകും

തിരിച്ചുവരുംനേര-
മച്ഛനമ്മമാരയല്‍-
വാസികള്‍ ബന്ധുക്കളു-
മൊത്തുചേര്‍ന്നവരുടെ
ചിത്രവുമെടുക്കും ഞാന്‍

രണ്ടു ജാതിയില്‍ രണ്ടു
നിലയില്‍പ്പിറന്നവ-
രുണ്ണുന്നു ഉറങ്ങുന്നു
ചാണകഗന്ധം പേറി
സാവിത്രി മത്സ്യംതൊട്ടു-
കൂട്ടുന്നു സുരേന്ദ്രന്‍ ആ
സ്വാദുള്ള ദൃശ്യം മന്ദ-
സ്മിതത്തില്‍ പൊതിയുന്നു

മെല്ലെമെല്ലെയായ്‌ വീര്‍ത്തു-
വരുന്ന വയറില-
ക്കണ്ണന്റെ ചിലങ്കക-
ളുണ്ടെന്നും കരുതുന്നു

എങ്കിലുമൊന്നോര്‍ക്കുമ്പോള്‍
സങ്കടം. അവരുടെ
തങ്കജീവിതം
ചിതല്‍തിന്നുവാന്‍ തുടങ്ങുന്നു!

2
ആരുമേ തുറക്കാത്തൊ-
രലമാരയില്‍ച്ചാക്കു-
നൂലാലെകെട്ടപ്പെട്ട്‌,
ജപ്തിചെയ്യുവാന്‍പോകും
വീടിന്റെയൊരിക്കലും
വെട്ടമേല്‍ക്കാത്ത മൂത്ര-
ച്ചായ്പിലായേകാന്തത്തില്‍
ച്ചത്തുപോയൊരു ഭാഷാ-
തല്‍പ്പത്തില്‍ കിടക്കുന്നു
നിത്യമക്കഥ, കണ്‍പോ-
ലടഞ്ഞ പ്രകൃതത്തില്‍

മരക്കുതിരകളുടെ രാത്രി

2008-02-24T01:32:00.000-08:00

ഞങ്ങളുടെ വീട്ടില്‍
മരക്കുതിരകളുടെ രാത്രി.

മുറികളില്‍ അവ ചന്ദ്രനെ അനുസരിക്കുന്നു
കുട്ടികള്‍ മാത്രം ഓടുന്നതു കാണുന്നു

എന്റെ മരിച്ച അപ്പന്‍
ഉണ്ടാക്കിവെച്ച കുതിരകള്‍ പാഴാകുന്നില്ല
വീട്ടില്‍ മരക്കുതിരകളുടേതാണ്‌ രാത്രി

ആരും ജനിക്കുന്നില്ല
ആരും മരിക്കുന്നില്ല
ഉണ്ണുന്നില്ല ഒരുങ്ങുന്നില്ല
ഇവിടെ മരക്കുതിരകളുടെ രാത്രിയാണ്‌
ഒരോ മുറിക്കും ഓരോരുത്തരുണ്ട്‌
അവര്‍ പുതച്ചുറങ്ങുന്നു
സ്ത്രീകളില്ല പുരുഷന്മാരില്ല
അവയവങ്ങളില്ല
മരക്കുതിരകള്‍
അവരുടെ രാത്രി.

വാതിലുകള്‍ തുറന്നിടുന്നു
വാതിലുകള്‍ അടച്ചിടുന്നു
കാറ്റടിക്കുന്നു ഉഷ്ണം പെരുകുന്നു
മരക്കുതിരകളുടെ രാത്രി
മനുഷ്യരേക്കാള്‍ ഇരട്ടി ഉയരത്തില്‍
യാഥാര്‍ത്ഥ്യം അനുസരിച്ച്‌
കൊല്ലങ്ങള്‍ ഇരുന്ന് പണിതീര്‍ത്ത
മരക്കുതിരകളുടെ രാത്രി.

കണക്ക്‌ തെറ്റാറില്ല
കടിഞ്ഞാണിടാറില്ല
പുല്‍മൈതാനങ്ങള്‍ തഴ്യക്കും
മുതിര കൊടുക്കും
വേഗം കരുത്ത്‌ ഭൂതകാലം
മരക്കുതിരകള്‍ മരക്കുതിരകള്‍ മരക്കുതിരകള്‍
രാത്രി.

മരത്തടികളില്‍ കുതിരകള്‍ ആരംഭിക്കുന്നു
അപ്പന്‍ ജനിക്കുന്നു
കുളമ്പ്‌ അപ്പന്‍ തിളങ്ങുന്ന ശ്രദ്ധ
കാല്‍കള്‍ അപ്പന്‍ കുതിക്കുന്ന നിഴല്‍
ഉടല്‍ അപ്പന്‍ വിയര്‍ക്കുന്ന സബ്ദം
നീളം അപ്പന്‍ കിതയ്ക്കുന്ന ശബ്ദം
വെളുപ്പ്‌ അപ്പന്‍ ഉറയ്ക്കുന്ന സ്വപ്നം
പ്രാണന്‍ അപ്പന്‍ കറുക്കുന്ന സ്പര്‍ശം

മരക്കുതിരകളുടെ രാത്രി
ഞങ്ങളുടെ വീട്ടില്‍

അന്ധന്‍

2008-02-15T02:26:00.000-08:00

‍തീവണ്ടിയില്‍
ഒരന്ധനുണ്ടായിരുന്നു
ഒരുഹാര്‍മ്മോണിയം ആയിരുന്നു അയാള്‍

എന്നും പുറകെ
പാടിനീങ്ങി അവന്റെ തുണ

ഒരിക്കല്‍
യാത്രികരിലൊരാള്‍
അവളില്‍ കണ്ണുനട്ടു

നട്ടതു പൂത്തു
പാളത്തിലൂടെ പാഞ്ഞു ആ ഭ്രാന്തവൃക്ഷം

ചിതറിവീണ പൂവുകള്‍ക്കിടയില്‍
രണ്ടു കറുത്ത സര്‍പ്പങ്ങള്‍
കരഞ്ഞു പിരിയുന്നത്‌
രാത്രി ഡ്യൂട്ടിക്കാര്‍ കണ്ടു

പിഴച്ചുപോയ ഭൂമിയില്‍
അതില്‍പ്പിന്നെ
റെയില്‍വേസ്റ്റേഷനുകള്‍ ഉണ്ടായില്ല

അന്നുമുതല്‍
തീവണ്ടിയും അന്ധനായി

പാര്‍ട്ടിമാവ്‌

2008-02-15T02:01:00.000-08:00

പാര്‍ട്ടി വളര്‍ത്തിയ മാവുണ്ട്‌
കുറ്റാരിക്കല്‍ തറവാട്ടില്
‍തൊടിയുടെ അറ്റത്ത്‌

പണ്ട്‌
അച്ഛനും കൊച്ചമ്മാനും
കുര്യാക്കോസുമാപ്പിളയും
അതിന്റെ ചുവട്ടിലിരുന്ന് എന്തോ
പിറുപിറുത്തിരുന്നത്‌
മുത്തശ്ശി ഇന്നലെ വീണ്ടും
ഞങ്ങള്‍ കുട്ടികളുടെ മുമ്പില്‍
വെളിവാക്കി

നെറ്റിയിലേക്ക്‌ ചുരുള്‍മുടി വീണ ഒരാള്‍
എന്നും അവിടെ വരുന്നപോലെ
തോന്നിയിരുന്നെന്നും
ആരും അധികനേരം
അങ്ങോട്ടു നോക്കാറില്ലെന്നും
മാപ്പിളയുടെ ഒച്ച
ഭീകരമായിഉയര്‍ന്നു താഴുമായിരുന്നെന്നും
അച്ഛന്റെ തുമ്മലില്‍ മാവ്‌ കുലുങ്ങുമായിരുന്നെന്നും
ഇടക്ക്‌ മൂത്രമൊഴിക്കാനെന്ന മട്ടില്‍
കൊച്ചമ്മാന്‍ പോകുമായിരുന്നെന്നും
എത്തുന്ന പാമ്പുകളെ
അച്ഛന്‍ കൊന്നു കുഴിച്ചിടുമായിരുന്നെന്നും
ചുരുളുകളായി സംഭവങ്ങള്‍ വീണു.

അതിനിടയില്‍
അച്ഛന്‍ അമ്മയെ കല്യാണം കഴിച്ചിരുന്നത്രേ
തൊപ്പിക്കാര്‍ വന്ന് എന്തോ കുഴിച്ചു നോക്കിയിരുന്നത്രേ
ചുരുളന്‍ മുടിക്കാരനോടൊപ്പം വേറൊരാള്‍കൂടി
വരാന്‍ തുടങ്ങിയിരുന്നത്രേ
ബീഡിക്കുറ്റികളുടെ കൂമ്പാരം
ക്രമാതീതമായി വര്‍ദ്ധിച്ചിരുന്നത്രേ
ശബ്ദവ്യത്യാസമുള്ളവര്‍ മാറിമാറി വന്ന്
വ്യക്തമായി ഒരു പുസ്തകം
വായിക്കുന്ന പതിവ്‌ ഉണ്ടായിരുന്നത്രേ
കാവിലെ താലപ്പൊലിക്ക്‌
കൊച്ചമ്മാനെയും മാപ്പിളയേയും
പൊലീസ്‌ കൊണ്ടുപോയെന്നും
ഒറ്റിയത്‌ ചേനത്തണ്ടനാണെന്നും
അച്ഛന്‍ ഓടിയാണ്‌ രക്ഷപ്പെട്ടതെന്നും
പിന്നീട്‌ മീശ വെക്കാന്‍ അമ്മക്ക്‌ പേടിയായിരുന്നെന്നും പറഞ്ഞു മുത്തശ്ശി

നേതാവ്‌ കൊച്ചമ്മാനായിരുന്നെന്നും
കൊച്ചമ്മാന്റെ ബുദ്ധിയാണ്‌
പാര്‍ട്ടിയെ ആകാശത്തോളം വളര്‍ത്തിയതെന്നും
ഇടികൊണ്ട ചുമകൊണ്ട്‌ പരവശപ്പെട്ട്‌
മരിക്കുമ്പോഴും
ആര്‍ക്കും ചോര്‍ത്തിയെടുക്കാനാവാത്ത ചിന്തകള്‍
അമ്മാവന്റെ കണ്ണുകളിലുണ്ടായിരുന്നുവെന്നും പറഞ്ഞു.
അമ്മാവന്‍ കല്യാനം കഴിച്ചിരുന്നെങ്കില്‍
അതിലുണ്ടാകുമായിരുന്ന പെണ്ണിനെ
ഞങ്ങളാര്‍ക്കെങ്കിലും
കല്യാണം കഴിക്കാമായിരുന്നെന്നും

അത്ഭുതത്തോടെ പൂത്ത
പാര്‍ട്ടിമാവിലേക്കും
മുത്തശ്ശിയിലേക്കും
ഞങ്ങള്‍ മാറിമാറിനോക്കി

വേലികടന്ന്
ഞൊണ്ടിഞൊണ്ടി
എന്തോ വായ്പക്ക്‌
ചേനത്തണ്ടന്‍ വന്നു.

വരവ്‌

2008-02-15T00:36:00.000-08:00

‌എത്രയോപേരെന്നറിയില്ല
പത്തായിരമല്ല ലക്ഷമല്ല
പക്ഷികളല്ല മൃഗങ്ങളല്ല
പക്ഷെ ചിറകടിയില്ലാതില്ല
ഗര്‍ജനമെങ്ങോ മുഴങ്ങാതില്ല
ആകാശം കാട്‌ കടലുമല്ല
കാഴ്ചയില്‍ നക്ഷത്രമല്ലാതില്ല
ചന്ദനം തമ്പകം പൂക്കാതില്ല
പൊന്‍തിര ചെമ്മേ കിലുങ്ങാതില്ല

എങ്ങുനിന്നാണീ വരവതെന്നോ
എങ്ങോട്ടുപോയിപ്പുലരുമെന്നോ
എന്തുകൊണ്ടിങ്ങനെയിത്രയാള്‍ക്കാ-
രുന്തുതള്ളില്ലാതൊരുമിച്ചെന്നോ-
യെന്തല്ല ചോദ്യങ്ങള്‍!

ഉത്തരവുമന്തമില്ലാതെ!

കുഴഞ്ഞു പാത.

കരച്ചില്‍

2008-02-15T00:31:00.000-08:00

‍ചിരിക്കുന്ന ഭാഗത്ത്‌
നടന്‌ കാന്‍സര്‍.

അത്‌
ഉറവിടുന്ന ഇടങ്ങളില്‍
പൂക്കള്‍ വിടരുകയും
സുഗന്ധം പരക്കുകയും ചെയ്യുന്നത്‌
ഇന്ന്അവനുമാത്രമേ അറിയൂ.

മറ്റ്‌ അവയവങ്ങളിലേക്ക്‌
ചിരി വിന്യസിച്ച്‌
തനിക്കു നഷ്ടപ്പെട്ടുപോയത്‌
തിരിച്ചെടുക്കാന്‍
ഒരവസാനശ്രമം നടത്തി

തന്റെ ഉദ്യമങ്ങളെ
വേദന
പിന്നില്‍ നിന്ന് കുത്തിയത്‌
നടന്‍ നേര്‍ക്കുനേര്‍ കണ്ടു.
കാണികള്‍ക്ക്‌കൊടുക്കാമെന്നേറ്റ
തങ്കപ്പവന്‍
താനൊളിച്ചുവെക്കുന്നതില്‍
സ്വയം കുറ്റപ്പെട്ടു.

എന്റെചിരി
എന്റെ ചിരി
എന്ന് വിലപിച്ചു.

ഒടുവില്‍ മുള്ളുകാട്ടില്‍നിന്ന്
കൊടുങ്കാറ്റ്‌ എന്നപോലെ
അവന്റെ മുഖം കോട്ടി
ചിരി
എന്നേക്കുമായിപറന്നുപോയി.

കഞ്ഞി

2008-01-29T19:41:00.000-08:00

മൂന്നു കല്ല്‌
ഉരി അരി
പുഴവെള്ളം
തീപ്പെട്ടി
കലവും.

കണ്ണടച്ചു ധ്യാനിച്ച്‌
തന്റെ കര്‍മ്മമെന്തെന്ന് നിശ്ചയിച്ചുറപ്പിച്ച്‌
ചെയ്യേണ്ടതു ചെയ്യുമ്പോള്‍
കഞ്ഞി ഉണ്ടാകുന്നു.

പക്ഷേ
ഇതൊക്കെ
മര്യാദക്കു സംഭവിക്കണമെങ്കില്‍
ഇവയെ ബന്ധിപ്പിക്കാനൊരാള്‍-
അതായത്‌ ഞാന്‍
അവിടെ ഉണ്ടായിരിക്കണം

പുഴയില്‍നിന്ന്
വെള്ളം ചുമന്നുകൊണ്ടുവന്നത്‌
ആ ഞാനല്ലാതെ പിന്നെ ആരാണ്‌?

പട്ടികളുടേയും
കുഷ്ഠരോഗികളുടേയും
തെണ്ടികളുടേയും
വിശപ്പു തീരുംവരെ
കഞ്ഞി വിളമ്പിക്കൊടുക്കുന്ന ഒരുവന്‍
എന്റെ സങ്കല്‍പ്പത്തിലുണ്ട്‌.
അവന്‍ ഇറങ്ങി വന്ന്
കീശയില്‍ കയ്യിട്ട്‌ തീപ്പെട്ടി
എറുമ്പ്‌ അരി
ക്ഷാമം കലം
ബാക്കി മൂന്നു കല്ല്
രാമന്‍ രാവണനെ കൊന്നു.
ഞാന്‍ കഞ്ഞി ഉണ്ടാക്കി.

പത്തു കല്‍പ്പനകള്‍

2008-01-29T19:10:00.000-08:00

മരിച്ച കടലും തോളത്തേറ്റി
ഒരിക്കല്‍ നീയെത്തുമ്പോള്‍
പൊരിച്ച മത്സ്യം പോലൊരു ചിരിയില്‍
പിടിച്ചിരുത്തും നിന്നെ
2
എത്രകൊല്ലം ഒരു പെണ്ണിനെത്തന്നെ
മുത്തിയാകെത്തുടുപ്പിച്ചു മുത്തച്ഛന്‍
അത്ര ചോന്നൊരു ചെങ്കൊടിയും കൊണ്ടു
പെറ്റിബൂര്‍ഷ്വ ഞാന്‍ നിന്നടുത്തെത്തുന്നു
3
സത്യം പറഞ്ഞു മടുക്കുന്ന നാവു ഞാന്‍
നിത്യം വടിച്ചു വെളിച്ചം വന്നു
കത്തിയിലൂടെ നടന്നുപോയ്‌ യൂദാസ്‌
കര്‍ത്താവ്‌ സര്‍ക്കസ്സു കണ്ടുനിന്നു.
4
ഉള്ള ഞരമ്പുകളെല്ലാം മനമെന്ന
കള്ളനു വീടു പണിഞ്ഞിടുമ്പോള്‍
ബുദ്ധി തലയോടു തല്ലിയൊരത്ഭുത
ബുദ്ധപ്രതിമ ചമച്ചിടുന്നു.
5.
പതിനായിരമാകുമോര്‍മ്മയെ
പിറനാളൊരു പത്തുകൊണ്ടൊരാള്‍
പിഴയാതെ ഹരിച്ചിടുമ്പൊഴേ-
ക്കുളവായതു ബ്രഹ്മിതന്‍ഘൃതം
6
അഴിച്ചിടുന്ന പശുക്കിടാവ്‌
പുലിക്കു വായില്‍ക്കയറുന്ന ചിത്രം
വരച്ചിടുന്ന പ്രകൃതിക്കുമുന്നില്‍
മിഴിച്ചു നില്‍ക്കുന്നതു ഹിംസ മാത്രം
7
മുയലിനെ
വെടിവെച്ച കുഴല്‍
കുയിലിനു കൂടായ്‌ ഒരിക്കല്‍
അവളിടും മുട്ടകളുടല്‍ കഴുകനായ്‌.
മാറില്ല കൂവല്‍.
8
വയ്ക്കുന്നു നിന്റെ
മുഖത്തൊരു കമ്പ്യൂട്ടര്‍
മൈക്കണ്ണിലെത്ര
മയിലുണ്ടെന്നറിയുവാന്‍
9
മലതന്‍ ചിത്രം
കടുംപച്ചയില്‍ പകര്‍ത്തുവാന്‍
നളന്റെ വേഷംകെട്ടി
മകന്റെ ചായപ്പെന്‍സില്‍
10
അന്ധരാജാവ്‌ ചിത്തത്തില്‍
സ്വരാജ്യം കണ്ടിടുന്നപോല്‍
സങ്കല്‍പ്പിച്ചു രസിക്കുന്നു
ഞാനെന്‍ജീവിതമങ്ങനെ

നിലാവിന്റെ കാന്തി

2008-01-19T18:40:00.000-08:00

നീലയില്‍വെള്ളം ചേര്‍ത്ത്‌
നിറം നേര്‍പ്പിച്ച്‌
നിലാവ്‌ ആവിഷ്ക്കരിക്കാമെന്ന്
ഞാനെന്റെ
ഇരട്ടപ്പെണ്‍കുട്ടികളോട്‌
പറഞ്ഞു.

സ്മിത അനുസരിച്ചു.
അവള്‍ അത്‌ വൃത്തിയായി ചെയ്തു.

സ്മേര അത്‌ ചെയ്തില്ല
പ്രതിഷേധിച്ച്‌
ഞാനും രേണുവുമറിയാതെ
ഞങ്ങളുടെ മാടം വിട്ട്‌
അവള്‍
അന്നുരാത്രി ഇറങ്ങിപ്പോയി

അടുത്ത ദിവസം
സ്മിത വരച്ചു
നിലാവിന്റെ കാന്തിയില്‍
വെള്ളത്തില്‍പ്പൊന്തികിടക്കുന്ന
സ്മേരയെ.

നീലയില്‍ വെള്ളം ചേര്‍ത്ത്‌
നിറം നേര്‍പ്പിച്ച്‌ .

അധിനിവേശം

2008-01-02T21:32:00.000-08:00

അഞ്ചുപേര്‍ എന്റെ വീടിന്‌

വെള്ള പൂശുന്നു.

ഞാനെന്റെ മുറിയില്‍

മയങ്ങുമ്പോള്‍.

മാസിക നോക്കി അവളും

മുല നുണഞ്ഞ്‌ മകളും

അടുത്തുണ്ട്‌.

വീടിന്റെ എല്ലാച്ചുവരുകളും

വെളുത്തുകൊണ്ടിരിക്കുകയാണ്‌

കാതില്‍ വളയം തൂക്കിയും

ഉള്ളങ്കയ്യില്‍

ഒരു ജന്തുവെ പച്ചകുത്തിയും

അവര്‍ നിന്നു വെള്ളപൂശുന്നു

മറ്റു നിറങ്ങളൊന്നും മനസ്സില്‍ വരാത്ത

അവരുടെ വെള്ള എത്രയോ വേഗതയില്‍?

അവര്‍ വീട്ടില്‍നിന്ന്പോകുന്നേയില്ല

ഒരു സൗന്ദര്യശാസ്ത്രം

അതിന്റെ ദേവതയെ അണിയിച്ചൊരുക്കുന്നപോലെയവര്‍

പൂശുന്നു വെള്ള

എന്റെ വീട്‌ വെളുത്തുവെളുത്തു.

ഞങ്ങളുടെയനുവാദമില്ലാതെ

ആരാണ്‌

ഈ വീട്‌ വെള്ള പൂശിയത്‌?

അസൂയ

2008-01-02T21:23:00.000-08:00

പ്രകടമായ്‌
നിന്റെ മുഖത്തസൂയ.

ഞാനത്‌
നാറത്തുണിയാലെ മൂടും
ഭൂമി കറങ്ങുന്നതിനും
വെള്ളമൊഴുകുന്നതിനും
രാത്രി ഇരുളുന്നതിനും
തീ കത്തുന്നതിനും
കിളി പാടുന്നതിനും
കുതിര പായുന്നതിനും
മനുഷ്യര്‍ ജീവിക്കുന്നതിനും
എതിരെ
പ്രകടമായ്‌
നിന്റെ അസൂയ

തല കുത്തിയ ചന്ദ്രക്കല കീറി.
നക്ഷത്രക്കണ്ണുകള്‍ ചീഞ്ഞ്‌.
തീട്ടം മണക്കുന്ന മുഖഭാവം.
എല്ലാം
നിനക്ക്‌ കൃത്യമായി ചേരും
അസൂയേ.

അന്യഗ്രഹങ്ങളിലും
കറ വീഴ്ത്തി
നീ ആകാശം മുട്ടെ
അങ്ങനെ നില്‍ക്ക്‌
ഞാനത്‌ നാറത്തുണിയാലെ
മൂടും.

ണാം!

2008-01-02T21:11:00.000-08:00

നട്ടപ്പാതിരയിലെ
പള്ളിമണിയൊച്ച
ഒരു പുണ്യവാളനെപ്പോലെ
വീടുകളില്‍ കയറിച്ചെന്ന്
സര്‍വരും ഉറങ്ങുന്നുണ്ടോ എന്നു തീര്‍ച്ച വരുത്തി
കുരിശു വരച്ച്‌
തിരിച്ചു നടന്ന്
മണിയിലേക്കുതന്നെ
കയറിപ്പോയി

എന്നാല്‍
നട്ടുച്ചയിലെ
പള്ളിമണിയൊച്ച
ഒരു മുഴുക്കിറുക്കനെപ്പോലെ
ഭൂമി കുലുക്കി
ഗതാഗതം സ്തംഭിപ്പിച്ചുകൊണ്ടേയിരിക്കുന്നു

അത്‌ കുരിശുവരക്കുന്നില്ല

വേണ്ടായിരുന്നു

2007-12-20T21:51:00.001-08:00

വേണ്ടായിരുന്നു
നിന്നൊടുള്ള പ്രേമം

പനിക്കൊപ്പം

പോളന്‍ പൊങ്ങി

പകലും രാത്രിയും

വെട്ടിത്തിളങ്ങി നീ

പറയരെടുത്തുകൊണ്ടുപോയ്‌

കുഴിച്ചിടുമ്പൊഴും

തൊഴുതു ഞാന്‍

നിന്‍കോലം

വേനല്‍ കഴിഞ്ഞു

മഴ വന്നു

പുതിയ കാറ്റും കടലും

ദേവീ

ഇപ്പോള്‍ എനിക്കു തോന്നുന്നു

വേണ്ടായിരുന്നു

നിന്നൊടുള്ള പ്രേമം

ഭ്രമം

2007-12-19T07:46:00.000-08:00

പഞ്ചാരക്കടല്‍
കയ്ക്കാത്ത പകല്‍
കാണായി കാനായി*
കല്‍കൊണ്ടൊരുറുമ്പിനെ

നിരനിരയായ്‌ നൂറാകും തിര
മധുരംകൂടി മദിച്ചോടുമ്പോള്‍
കരപേടിയിലൊറ്റക്കല്ലില്‍-
കളിവേഷമെടുക്കാന്‍ വെമ്പി
അതുകൊണ്ടതു ചോണനുറുമ്പി-
ന്നിളകാത്തൊരു ചന്തം ചിന്തി

പ്രളയം പ്രളയതരം പ്രളയതമം
ലയമിതിലും യുദ്ധത്തിന്‍ക്രമം

ഒരു തിരയില്‍ വാക്കിന്‍ വായ്ത്തല
ഒരു തിരയില്‍ ഗാന്ധിപ്പൊന്‍തല
ഒരു തിരയില്‍ ആനത്തലയുണ്ടൊരു തിരയില്‍
കുതിരത്തലയുണ്ടൊരു തിരയില്‍ തലകളരിഞ്ഞൊരു
മലദൈവം വേറൊരു തലയായ്‌

പ്രളയം പ്രളയതരം പ്രളയതമം
ലയമിതിലും സ്വപ്നത്തിന്‍ ഭ്രമം

സമചതുരം മെല്ലെ വരക്കേ
മണലില്‍ വിരലുമ്മകള്‍ വെക്കെ
ത്രിഗുണാത്മികയാമൊരു പെണ്ണിന്‍
ഗണിതത്തിനു കാമമുദിക്കേ
ഉടല്‍
ജീവനു-
മേകാന്തതയുടെ
കടലാകും ബീജവുമിളകും
തിരവരവായ്‌
മഹായന്ത്രത്തിന്‍ കര ഗൗരവചിന്തയിലായി'
ഇവയൊക്കെ വെറും മധുരത്തിന്‍ കളി.
രണവും രതിയും ദൈവവുമൊരുപോല്‍
കളിമണ്ണിലുയിര്‍ക്കാമുടയാ-
മൊരുകൈയിലിരിക്കും വിരുതില്‍'

പ്രളയം പ്രളയതരം പ്രളയതമം
ലയമിതിലും ശബ്ദത്തിന്‍ ക്രമം

കലികേറിയനങ്ങാതങ്ങനെ
ഒരു കല്ലിലുറുമ്പതുമങ്ങനെ
കടികൊള്ളുമബോധവുമായി
കടല്‍ വീണ്ടുമിരമ്പുമതങ്ങനെ

പ്രളയം പ്രളയതരം പ്രളയതമം
ലയമിതിലും ശില്‍പ്പത്തിന്‍ ക്രമം

പഞ്ചാരക്കടല്‍
കയ്ക്കാത്ത പകല്‍
കാണായി കാനായി
കല്‍കൊണ്ടൊരുറുമ്പിനെ.

കാനായി: ശില്‍പ്പി കാനായി കുഞ്ഞിരാമന്‍

ലീല

2007-12-07T08:55:00.000-08:00

ചതുരംഗം കളിക്കുമ്പോള്‍
കരുക്കള്‍ക്കിടയില്‍
സൂചികള്‍ വീഴാറുണ്ട്‌ .

വേര്‍തിരിഞ്ഞു കേള്‍ക്കാം അവയെ.

കാണാം
തല കൂട്ടിമുട്ടുന്ന
രണ്ടു മലകള്‍ക്കിടയിലെ ഗ്രാമം
കളം
സൂചികളുടെ വീഴ്ച്ച

പിന്നെ രാവ്‌.പകല്‍ രാവ്‌ പകല്‍....

കാണാം
ഗ്രാമത്തിലെ മനുഷ്യരിലും
സമാനമായ ലീലകള്‍ ഉടലെടുക്കുന്നത്‌
അവിടെയും സൂചികള്‍ വീഴുന്നുണ്ട്‌

വീഴുന്നവയുടെ മേധാശക്തിയില്‍
കളി നീളുന്ന കാലത്തെയാകെ
നിലത്തു വാഴുന്നവ
ഒരു തിരുവോണ വെളിച്ചത്തില്‍
സ്നാനപ്പെടുത്തുന്നു.

ചെരിഞ്ഞ മലകള്‍
രണ്ടു സഹോദരന്മാരാണെന്ന്
തെളിച്ചു പറയുകയാണ്‌ പ്രഭാതം.

ഒടി

2007-12-07T00:43:00.000-08:00

അയല്‍വാസി ഒടിവെച്ചു.

അവന്‍ പാഞ്ഞു ഗള്‍ഫിലേക്ക്‌.

ഒടിയുടെ പാണ്ടുകള്‍

മണലില്‍ ഉരച്ചു കഴുകുമ്പോള്‍

ഒരു കൂറ്റന്‍ അറബിയെക്കണ്ടു.

അവിടെ ഈന്തപ്പനത്തോട്ടത്തില്‍ കാവല്‍ക്കാരനായി.

എന്നും രാവില്‍ ജിന്നുകളെ ഓടിച്ചു

ഒരുപാടു ചന്ദ്രനെക്കണ്ടു.

തിരിച്ചുപോരുമ്പോള്‍ കീശയില്‍

ഒരു ഭൂഖണ്ഡം നിറയെ ദിനാര്‍ ഉണ്ടായിരുന്നു.

മുടിയാകെ നരച്ചിരുന്നു

സ്വര്‍ണ്ണപ്പല്‍ വന്നിരുന്നു.

നെടുമ്പാശ്ശേരിയില്‍ ഇറങ്ങി.

അത്ഭുതപ്പട്ടി

അതിശയപ്പൂച്ച

മൂത്തമകള്‍ സുപ്രിയ

ഇവര്‍ക്കിടയില്‍

പൂര്‍വാധികം വ്യക്തതയോടെ

കാത്തുനിന്നു അയല്‍വാസി.

വ്യംഗ്യമായിഒരു കത്തി

നിവര്‍ന്നതുപോലെ തോന്നി.

സംശയിച്ചില്ല

പണ്ടുവച്ചുമറന്ന ഉമ്മകള്‍

സുപ്രിയയില്‍നിന്ന്

ഝടിതി

തിരിച്ചുവാങ്ങിച്ചു.

നിലത്തുവീണ്‌

നീണ്ടുനീണ്ട്‌

നമസ്കരിച്ച്‌

നിസ്കരിച്ചും

അയല്‍വാസി

ഇഴഞ്ഞുപോയി .

ഒഴിഞ്ഞുപോയി.

ആത്മഗതം

2007-12-06T22:44:00.000-08:00

എങ്ങും ഇരിക്കാന്‍ കഴിയാത്ത

ഒരവസ്ഥയുണ്ട്‌ കാറ്റിന്‌

കിടക്കപ്പൊറുതിയിലും

അത്‌ ഇണയെ

ഭീകരമായി

ചലിപ്പിച്ചുകൊണ്ടിരിക്കും.

സംയമനം ആര്‍ജിച്ച്‌

ഒന്നു നില്‍ക്കാന്‍ ശ്രമിക്കുമ്പോഴാകും

ചില്ലകള്‍ ആടുക

പാട്ടുകളാല്‍ സ്വയം വരിഞ്ഞുകെട്ടി

നിശ്ചലതയെ ജന്മലക്ഷ്യമാക്കി

പറക്കുന്നവനെ

ആരു കേള്‍ക്കാനാണ്‌ ?

അതുകൊണ്ട്‌

കുട്ടികളുടെ ജീവിതത്തിലേക്ക്‌

മാമ്പഴങ്ങള്‍ വീഴ്ത്തി

അത്‌ ദു:ഖം മറക്കുന്നു.

രണ്ടു കള്ളന്‍മാര്‍

2007-12-04T23:55:00.000-08:00

ഒന്നാം കള്ളന്‍

ജനാലയ്ക്കല്‍ കണ്ട തല
ഓടിച്ചെന്നപ്പോള്‍ തോട്ടത്തിലായി
ഓടിച്ചെന്നപ്പോള്‍ ഗേറ്റിലായി
ഓടിച്ചെന്നപ്പോള്‍ തെരുവിലായി

തലാതാഴ്ത്തി ഞാന്‍ തിരിച്ചു
വീണ്ടും തല ആവര്‍ത്തിച്ചു

ഓടിച്ചെന്നപ്പോള്‍ മാവിലായി
ഓടിച്ചെന്നപ്പോള്‍ തെങ്ങിലായി
ഓടിച്ചെന്നപ്പോള്‍ മാനത്തായി

പതുക്കെ ചെന്ന്
ചെവിക്കു പിടിച്ച്‌
തലതാഴ്ത്താതെ തിരിച്ചുവന്ന്
മുറിയിലിട്ടുപൂട്ടി
ഒരു ബീഡിയിരുത്തി വലിച്ച്‌
ശിഷ്ടജീവിതമാസ്വദിച്ചു.

ബീഡിയും തീര്‍ന്നു

താക്കോല്‍പ്പഴുതിലൂടെ
സൂക്ഷിച്ചുനോക്കിയപ്പോള്‍
അവനെന്റെ മെത്തയിലിരുന്ന്
ഒരു ബീഡി വലിച്ച്‌
തീര്‍ക്കുന്നു സ്വന്തം മരണശയ്യ.

രണ്ടാം കള്ളന്‍

രാത്രിയാണ്‌
ചന്ദ്രനുണ്ട്‌

പടിപ്പുര തുറന്ന്
മേലാകെ എണ്ണയിട്ടുമിനുക്കിയ
ഒരാത്മവിശ്വാസം
വീട്ടിലേക്ക്‌ കയറിപ്പോകുന്നുണ്ട്‌
പണപ്പെട്ടി കുത്തിപ്പൊളിക്കുന്നുണ്ട്‌
പവന്‍ കവരുന്നുണ്ട്‌
ഇണചേരുന്നവര്‍ ചാടിയെണീക്കുന്നുണ്ട്‌
ആളെക്കൂട്ടാന്‍ അലറിവിളിക്കുന്നുണ്ട്‌
എണ്ണയിട്ടുമിനുക്കിയ ആ പ്രശാന്തചിത്തം
സംഭ്രമരഹിതമായി
പടിപ്പുരയില്‍ത്തന്നെ മറയുന്നുണ്ട്‌.

എന്നാല്‍
ശബ്ദത്തിന്റെ അഭാവം
അവിടെ എങ്ങും ഉണ്ട്‌ .
അത്‌
എവിടെയോ
ഓംകാരത്തെ അന്വേഷിച്ച്‌
അലയുന്നതുകൊണ്ട്‌.

എന്റേയും ഗുരുനാഥന്‍

2007-11-26T22:03:00.000-08:00

ഗാന്ധി
പ്രമേയമാകുന്നൊരു രാത്രിയില്‍
ശാന്തനൊരാള്‍
മദ്യവൃക്ഷം സ്മരിച്ചു
ഭൂമിയില്‍ നീണ്ടുനിവര്‍ന്നു നില്‍ക്കും ദൂരം
സൂര്യശില്‍പങ്ങള്‍ പിറന്ന മിനാരം
ഓര്‍മ്മയിലെ മയില്‍തുള്ളുമിലക്കൂട്ടം
ഓടിയെത്തുന്ന നിറങ്ങളിലെ
ദൈവം.

ശാന്തനയാള്‍ വീണ്ടും
മദ്യവൃക്ഷം സ്മരിച്ചു.

ഒറ്റക്കുനിന്നു നിറഞ്ഞ മനസ്സ്‌
അതില്‍-
നിന്നിറ്റിറ്റു വീണതതുല്യ തേജസ്സ്‌
സത്യം വെളിച്ചപ്പെ ടുംവരെ മേധയില്‍
വെട്ടിത്തിളച്ചുപതഞ്ഞുയരും
നൊസ്സ്‌ .

ഒക്കെ-
യൊരിക്ക‌-
ലൊരേടത്തു
ചേര്‍ന്നതീ-
യുള്‍ക്കടല്‍‍വക്കിലെ
സ്വപ്നത്തിലാണെന്നു
പച്ചവരകളുയിര്‍ത്തുരിയാടുന്നു

ഗാന്ധി
പ്രമേയമാകുന്നൊരാരാത്രിയില്‍
ശാന്തനൊരാള്‍
മദ്യവൃക്ഷം സ്മരിച്ചു

കേക

2007-11-23T04:14:00.000-08:00

കേകയില്‍

‍സമുദ്രം വര്‍ണ്ണിച്ചതിന്‌

അവനുകിട്ടി

കടുത്ത ശിക്ഷ.

തുറുങ്കില്‍ക്കിടന്ന്

അവന്‍ മയിലായ്‌

ചുവടുവെച്ച്‌

മരിച്ചുപോയി

മൂന്ന്‌ രണ്ട്‌ രണ്ട്‌

ഈ ക്രമത്തില്‍

തിര രചിച്ച്‌

അതേ സമുദ്രം

അവനെ വര്‍ണ്ണിച്ചു

അനന്തമായി

സത്യം

2007-11-20T20:24:00.000-08:00

കാവിന്റെ മുന്നിലെ

വിശാലമായ പാടത്ത്‌

നിരന്നിരുന്ന്

പൊങ്കാല വേവിക്കുന്ന

മനുഷ്യര്‍ക്കുമേലെ

ആകാശത്ത്‌

മൂന്നുരു

വട്ടമിട്ടു പറക്കുന്ന

പരുന്തിനറിയാം

വിശപ്പിനെ

ദൈവത്തെ

അതുകൊണ്ട്‌

ക്ഷണം

അത്‌ തിരിച്ചുപോകുന്നു

ആ സുഹൃത്ത്‌

2007-11-18T23:32:00.000-08:00

ആ സുഹൃത്ത്‌
ഇപ്പോള്‍ വരും.

തണുത്ത കാപ്പി കളഞ്ഞ്‌
ഇളനീര്‍ വെക്കുക
അവന്‍ ദാഹം തീര്‍ത്തോട്ടെ.

പുതിയ മെത്തവിരികള്‍ ചാര്‍ത്തുക
ലില്ലിപ്പൂക്കളേക്കാള്‍ ചെമ്പരത്തിയാണവനിഷ്ടം.

തെക്കോട്ടുള്ള വാതില്‍ തുറന്നിട്ടേക്കുക
അങ്ങോട്ടു നോക്കിക്കൊണ്ടിരിക്കുമ്പോള്‍
അവന്‍ ഏറെ സുന്ദരനാകാറുണ്ട്‌.

ചുമരില്‍നിന്ന് ദേവന്മാരെയിറക്കി
പെയിന്റിങ്ങുകള്‍ തറയ്ക്കുക .
നിറങ്ങളൂടെ മിശിഹയാണവന്‍.

കിണറു മൂടുക.
കൂടുതല്‍ ജാതി നടുക
വളര്‍ത്തുമൃഗങ്ങളെ പലയിടത്തേക്കു വിടുക

തീകൊളുത്തി
അരിയിട്ട്‌
അടുക്കള അവസാനമായി പൂട്ടി
ഇടനാഴിയിലൂടെ ഓടി
മുകളിലേക്കുള്ള പടികള്‍
ചടുപടാ ചവിട്ടി
വിശാലമായ ടെറസ്സില്‍ക്കടന്ന് കൂവി വിയര്‍ത്ത്‌
താഴെ സിറ്റൗട്ടിലേക്കു ചാടി
ഗെറ്റിലേയ്ക്ക്‌ കണ്ണുകള്‍ പറപ്പിച്ച്‌
'മാനസിക സംഘര്‍ഷം എന്നെന്നേക്കുമായി
കുറയ്ക്കാമോ ?'
എന്ന പുസ്തകം
നിവര്‍ത്തി വായിച്ചു കൊണ്ടിരിക്കുക.

അടുത്ത ടെലഫോണ്‍ബെല്ലിനോടൊപ്പംതന്നെ
നിന്റെ മുറിയിലും തൊടിയിലും
ശരീരത്തിലും ആത്മാവിലും
ഭാവികാലത്തിലും
പുറത്ത്‌ മെതിയടികള്‍ ഊരിവെച്ച്‌
മാന്‍തോലുകള്‍കൊണ്ടുള്ള കയ്യുറ ധരിച്ച്‌
സംസ്കൃതചിത്തനും
വിനയോന്മത്തനുമായി
കഞ്ഞിത്തിളത്താളത്തില്‍ ഒരുവന്‍ പെരുകുന്നതു കാണാം.

ആ സുഹൃത്ത്‌
ഇപ്പോള്‍ വരും.

ഉണ്ട്‌

2007-11-15T01:29:00.000-08:00

ഉണ്ട്‌. മറിഞ്ഞ ചഷകം സദാ എന്റെ
മിണ്ടാത്ത മേശപ്പുറത്ത്‌. നീ പന്തിയില്‍
നിന്ന് എണീറ്റ്‌ കുതിരപ്പുറത്തേറി
'ഇപ്പോള്‍ വരാ'മെന്നു ചൊല്ലിയോരേഴടി-
പ്പൊക്കം ധരിച്ച കിനാവ്‌ മറഞ്ഞതും.

പിന്നെ നീ വന്നില്ല യാഥാര്‍ത്ഥ്യമേ, തനി-
സ്സങ്കല്‍പ്പമായതു ഞാന്‍ ജീവനേ, നിന്റെ-
യുന്നം പിഴക്കാത്തൊരമ്പ്‌ (അതോ റൈഫിളോ?)
ചെന്നു മുഴങ്ങിയതെങ്ങെന്റെ ദൈവമേ!

കുന്നു കയറുവാന്‍ വയ്യെനിക്കത്രക്ക്‌
കുന്നുകൂടി നടത്തത്തില്‍ വിമൂകത
എങ്ങനെ നീന്തും മറുകരേക്കങ്ങിനെ
ചുമ്മാ കടക്കുവാനാകുമോ നിത്യത?

എങ്കിലും നിന്‍ മരണം ശത്രുനാശക-
മെന്നു പറഞ്ഞു ഞാനുള്ളോടടുപ്പിച്ച -
തന്നു പകര്‍ന്ന നിമിഷം. ചവര്‍പ്പില-
ച്ചെമ്പന്‍ കുതിര തൊഴിച്ചെന്റെ ചുണ്ടിലും.

മന്നത്തെ കാവടി

2007-11-13T21:07:00.000-08:00

മന്നത്തെ കാവടിക്ക്‌ ഞാന്‍ പോയിട്ടില്ല.

മുരുകന്റെ മയിലുകള്‍ നിറയുന്നത്‌
സങ്കല്‍പ്പിക്കുകയാണ്‌

തുള്ളുന്നവര്‍ നാവില്‍ വേലടിക്കുമോ?
എല്ലാവര്‍ക്കും ഇഷ്ടംപോലെ പഞ്ചാമൃതം കിട്ടുമോ?
'ഹരഹരോഹര' എന്നാകുമോ ആവേശം?
കൊടകരഷഷ്ഠിയെ വെട്ടുമോ മന്നത്തെക്കാവടി?

മന്നത്തെ കാവടിക്ക്‌ ഞാന്‍ പോയിട്ടില്ല.

മന്നം വടക്കന്‍ പറവൂര്‍ മുനിസിപ്പാലിറ്റിയില്‍ത്തന്നെയാണോ?
മന്നത്തു പത്മനാഭന്‍ അവിടത്തുകാരനാണോ?

'മന്നമന്നം നിദ്രവന്നെന്‍' എന്ന പാട്ടിലെ
മന്നമാണോ ഈ മന്നം?

സംശയങ്ങള്‍കൊണ്ട്‌ മാനം കറുത്തപ്പോള്‍
മന്നത്തേക്കുള്ള വാഹനങ്ങള്‍ എത്തുന്നു.
അവ നൃത്തം ചെയ്യുന്നു.

മന്നത്തെക്കാവടിക്ക്‌ ഇത്തവണ ആരൊക്കെ പോകും?

തത്തകളുടെ സ്കൂള്‍

2007-11-12T01:35:00.000-08:00

എന്റെ നാട്ടിലെ
കുറുപ്പുമാഷടെ വയല്‍
വിളഞ്ഞപ്പോള്‍ ഒരിക്കല്‍ ചിരിച്ചു.

സൂര്യന്‍ പൊട്ടി വിരിഞ്ഞു ഗായത്രികള്‍
യൂണിഫോമുകള്‍
വരവായി തത്തകള്‍

യോഗാത്മകതയില്‍ അവ
വായുവില്‍ നിന്നു
കതിരുകള്‍ കൊത്തി
മണി എണ്ണി
ഗുണം കൊറിച്ചു
വീണയും പഠിച്ചു

ഗുരുദക്ഷിണയായി
പച്ച എന്ന് ആകാശത്തെഴുതി
ഫോട്ടോയ്ക്ക്‌ പോസ്‌ കാണിച്ച്‌ പറന്നു

'ഹരിതത്തെ ഹരിതം ഹരിച്ചു തീര്‍ന്നപ്പോള്‍ പൂജ്യം'
കുറുപ്പുമാഷ്‌ പറഞ്ഞു .

വലിയൊരു ചന്ദ്രനെ വരച്ചുവെച്ചിരുന്നു
തത്തകള്‍.

പ്രതിബിംബം

2007-11-09T07:25:00.000-08:00

വെള്ളത്തില്‍ എന്റെ പ്രതിബിംബം തെളിഞ്ഞു
പിന്നില്‍ ആലവട്ടം പോലെ ചുമര്‍ക്കണ്ണാടിയും

അതും ഞാനും വെള്ളത്തിലെ
കണ്ണാടിയില്‍ വന്നതും
വെള്ളത്തിലെ കണ്ണാടിയും ഞാനും
ചുമര്‍ക്കണ്ണാടിയില്‍ ബിംബിച്ചതിന്റെ ഛായ
വീണ്ടും വെള്ളത്തില്‍ പ്രതിഫലിച്ചതും
ഞാന്‍ കണ്ടു കഴിഞ്ഞു.

വെള്ളത്തെ ഉപേക്ഷിച്ച്‌
ചുമര്‍ക്കണ്ണാടിയിലേക്ക്‌ നോക്കിയതിനൊപ്പവും
ഞാനും പ്രതിബിംബവും
നേരത്തേ വര്‍ണ്ണിച്ച പടലയും
കൂടെത്തന്നെയുണ്ട്‌.

വെള്ളത്തില്‍ കല്ലിട്ടു
കണ്ണാടിയില്‍ തല തല്ലി
പ്രതിബിംബ സമ്മേളനം പിരിഞ്ഞുപോയി

തിരശ്ചീനമായ ജ്ഞാനത്തിന്‌
മുഖം നോക്കാത്ത സത്യസന്ധതയുണ്ടെന്ന്
പിറുപിറുത്ത്‌
ഇപ്പോള്‍ ഹൈവേയിലൂടെ
ലോകം മുഴുവന്‍
ഞാന്‍ ചുറ്റി നടക്കുകയാണ്‌.

അഗ്രേ പശ്യാമി

2007-11-05T23:15:00.000-08:00

തലമുടിയില്‍നിന്നുതുടങ്ങണം എല്ലാം.
ഈശ്വരനായാലും എതിര്‍ലിംഗമായാലും .

ആദ്യം മുഖചന്ദ്രന്‍
അവസാനം മതി കാല്‍നഖം
ഇടയില്‍ അനാദ്യന്തയായ
ആകാശമേ സങ്കല്‍പ്പിക്കാവൂ.

ആശ കൈവിടരുത്‌

ശൂന്യതയില്‍ ഉമ്മ വെക്കണം
ആവര്‍ത്തിച്ചു മണക്കണം
കാക്കപ്പുള്ളികള്‍ വലം വെച്ച്‌
കാലം ദീര്‍ഘിപ്പിക്കാം

ധരിക്ക
കാറ്റ്‌ ഇന്ദ്രിയങ്ങളെന്ന്
ഇടിമിന്നല്‍ മനസ്സെന്ന്
ഭൂമി വികാരമെന്ന്
സൂര്യന്‍ ബുദ്ധിയെന്ന്
ഇരവുപകലുകള്‍ അവ മാത്രമെന്ന്

ശിവന്‍
യേശു
ബുദ്ധന്‍
മാര്‍ക്സ്‌
ഇവ്വഹവേഷങ്ങള്‍
അഴിഞ്ഞെന്നു ബോധ്യം വന്നാല്‍ മാത്രം
പുരുഷോത്തമനാകുക

മനുഷ്യനെ മുന്നില്‍ നിര്‍ത്തിയാകണം കളികളൊക്കെ.

ഇനി
സഹസ്രശീര്‍ഷനായി
അയാളുടെ പാടായി.

വെടി

2007-11-04T03:45:00.000-08:00

ശരീരമൊക്കെയും തുളകളാണെന്റെ.

കഴിഞ്ഞ പാക്കിസ്ഥാനതിര്‍ത്തിയുദ്ധത്തില്‍
ഒരാള്‍ ഹനുമാന്റെ സ്മരണമാത്രയില്‍
ഗിരിസമാനനായ്‌ നിവര്‍ന്നുവന്നത-
ന്നതതുപത്രത്തില്‍പടവുമായ്‌ വന്നു.

നിറതോക്കില്‍നിന്നും
നിറയാക്കണ്ണില്‍ വന്നൊരു വെടി.
ശത്രു വിരട്ടു മാത്രമാണെനിക്കന്നും ഇന്നും.

ചിലപ്പോള്‍ കാതില്‍നിന്നൊരു പാറ്റണ്‍ടാങ്കിന്‍
ശിഥിലമാംശബ്ദമൊരുചിത്രമാക്കിയെടുത്തു ചുംബിക്കും
ചില ഞരമ്പൊക്കെ മുറിഞ്ഞതില്‍ നീരും
ചലവുമൂറാതെ ശിവജപം ചെയ്യും
ഇതിഹാസത്തിനു പുറത്തു നില്‍ക്കിലു-
മെഴുതിവയ്ക്കും ഞാനൊരു യുദ്ധകാണ്ഡം.

മിടുക്കന്‍ പിള്ളരെന്‍ കഥകളാല്‍ കൂട്ട-
ക്കരച്ചിലിന്‍ വക്കില്‍
പകച്ചു നില്‍ക്കുമ്പോള്‍
' വെടി വെടി വെടി'

അടുക്കളയ്ക്കുള്ളില്‍
പ്രിയതമയെന്നെ ചിരിച്ചു തള്ളുന്നു.

കറിയ്ക്കരിയുന്നു

മരിച്ചു വീണു ഞാന്‍ ചരിത്രമാവുന്നു.

കാന്‍വാസ്‌

2007-10-31T02:31:00.000-07:00

ചിത്രകലയുമായി ബന്ധപ്പെട്ട
രാഗിണി
പെറ്റു.

വെള്ളപ്പൂച്ച
കരിങ്കാക്ക
പച്ചത്തുള്ളന്‍
മഞ്ഞച്ചേര
നീലമയില്‍
ചെമ്പുലി....

മക്കള്‍ ഒരുമിച്ച്‌ മിഴി തുറന്നപ്പോള്‍
ജീവനുള്ള കാന്‍വാസ്‌ ആയി കട്ടില്‍.

എണ്ണമറ്റ
കൈകള്‍ക്കിടയില്‍
ജ്വലിച്ചു
നിറങ്ങളുടെ അമ്മ.

സമ്മേളനം

2007-10-28T01:33:00.000-07:00

കസേരകള്‍
ഇടയ്ക്കൊഴിഞ്ഞു ഇടയ്ക്കു നിറഞ്ഞു
ചഷകങ്ങളെപ്പോലെ.

ചഷകങ്ങളാവട്ടെ
സ്വത്വം കൈവിട്ടില്ല
കസേരകളാകാന്‍ തുനിഞ്ഞില്ല
ഇടയ്ക്കു നിറഞ്ഞു ഇടയ്ക്കൊഴിഞ്ഞു
ചഷകങ്ങളെപ്പോലെ.

സമ്മേളനത്തിന്‌
ഇവ രണ്ടും ആവശ്യമായിരുന്നു

കസേരകളൂം ചഷകങ്ങളൂം.

ആകാശം സംസാരിക്കുന്നു

2007-10-26T00:27:00.000-07:00

താഴെ നടന്നു പോകുന്നവരുടെ
പാവാട ഡിസൈനുകള്‍
ആസ്വദിക്കുകയാണ്‌
ഇന്നലെ മുതല്‍
എന്റെ പണി.

സൂര്യഗ്രഹണം
കൊള്ളിമീന്‍ വീഴ്ച
ജംബോജെറ്റ്‌
പറക്കുംതളിക
തുടങ്ങിയ ദിനചര്യകളില്‍
രസം തീരുന്നു.

സ്വര്‍ഗം ഉദയാസ്തമയം എന്നീ തട്ടിപ്പുകളും
ഇടിമഴ മിന്നല്‍ കോപ്രായങ്ങളും
മടുക്കുന്നു.
ആരാണ്ടുവെച്ചു കെട്ടിയ
നീലനിറം വിളര്‍ക്കുന്നു.

ദൈവം ചുരുണ്ടുകൂടിയ
മഹാമര്‍ക്കട മുഷ്ടിയായി
എന്നെ വിഭാവനംചെയ്ത്‌
തത്വചിന്തകന്മാര്‍ എയ്യുന്ന നോട്ടത്തില്‍
ആകെ ചൂളിപ്പോകുന്നു.

ഇനി വയ്യ.

യാഥാര്‍ത്ഥ്യത്തിനു നിരക്കാതെ
ഭുമിയില്‍ വേരു പടര്‍ത്താതെ
അനന്തതയെന്നും
മിസ്റ്റിക്‌ എന്നും
സ്വയം നടിച്ച്‌
നശിച്ചുപോകുന്നതില്‍ കഴമ്പില്ല
കണ്ണുകള്‍ പാഴാക്കിക്കളയുന്നില്ല.

നീണ്ടുനിവര്‍ന്ന ഒരു കിടപ്പിനേക്കാള്‍
എത്രയോ മനുഷ്യപ്പറ്റുള്ളത്‌
കൂനിക്കുറുകിയുള്ള
ഒരു നടത്തം!

ബീഡിവലിക്കാരുടെ നിലപാടുപുകകള്‍
മേഘങ്ങളുടെ വിശ്വസിക്കാന്‍കൊള്ളാത്ത
രൂപപരിവര്‍ത്തനവാദങ്ങളേക്കാള്‍
എത്ര സത്യാത്മകം!

പൊട്ടുപോലെ കാണുന്ന
ആ പള്ളിത്തുഞ്ചത്ത്‌
ഈ ചവറുകളേക്കാളൊക്കെ
ചന്തമുള്ള ഒരു നക്ഷത്രം
കത്തുന്നുണ്ടല്ലോ.
തൊട്ടടുത്ത്‌ ഒരു കൊടി
പോകുന്നു പക്ഷിനിരകള്‍
വൈദ്യുതി എന്ന മാലാഖ
അവളുടെ ലാവണ്യദര്‍ശനം
നിവര്‍ത്തി വായിക്കുന്നതും
കാണുന്നു.

അപ്പുറത്തെ പര്‍വതങ്ങളുടെ
ആ നില്‍പ്പില്‍
മരണത്തെ അതിജീവിക്കാന്‍ കെല്‍പ്പുള്ള
ഒരു പുതു ജീവിവംശത്തിന്റെ
ഛായ
തെളിഞ്ഞു വരുന്നത്‌
സന്തോഷം തരുന്നു.

ഇനിയും താഴോട്ടു തന്നെ നോക്കാം.

ഹായ്‌!
ഈ ലോകം മുഴുവന്‍ പെണ്‍കുട്ടികള്‍
നടന്നുപാവുകയാണല്ലോ?
ബ്ലൗസില്ലാതെ
പാവാട മാത്രമണിഞ്ഞ
ഈ സുന്ദരിക്കൂട്ടങ്ങള്‍
എനിക്കുവേണ്ടി
മനുഷ്യനൊരുക്കിയ
ഒരു തമാശയാണെങ്കിലൊ!

മരക്കൊമ്പിലും
നരിപ്പുറത്തുമൊക്കെ
പെണ്‍കുട്ടികള്‍ തന്നെ!

പാവാടഡിസൈനുകളില്‍
ലയിച്ചു ചേര്‍ന്നോട്ടെ
എന്റെ ജന്മം.

ഛായ

2007-10-24T22:09:00.000-07:00

ഒരേ മുഖച്ഛായ.
ഒരു കടലിന്റെ
ഒരേ തീരത്തൊറ്റക്കൊരേയിരിപ്പാണ്‌
ഇരുവരെങ്കിലും.
തിരയനേകമായ്‌പ്പെരുകിയെങ്കിലും
പകലും സന്ധ്യയും പലതരം രാവും പഴയകാലവും
പുതുതും ഭാവിയു-
മുരുകിയാഴങ്ങളിളകിയെങ്കിലും
ഒരേ മുഖച്ഛായ.

ഇരു പ്രതിബിംബം
ചിതറിപ്പൊന്തുമ്പോളൊരേ മുഖച്ഛായ

ഇവരാരാണെന്നു പറയുവാനുള്ള-
തറിവിലുമില്ല ഒഴിവിലുമില്ല.

ഒരേപ്രണയത്തിന്നിരട്ടപ്പേറെന്നോ
ഒരേ ഗാനത്തിന്റെയിടയ്ക്കക്കൊട്ടെന്നോ
ഒരേ സര്‍പ്പത്തിന്റെ പിളര്‍ന്ന നാവെന്നോ
പറയുവാനാര്‍ക്കുമുറപ്പെടുന്നില്ല.

ഒരേയിരിപ്പാണ്‌
ഇരുവരെങ്കിലും
ഒരേ മുഖച്ഛായ

ഒരു കടലിന്റെ ഇരുട്ടുകോട്ടയില്‍
ഒരു കടലിന്റെ വെളിച്ചത്തീക്കാട്ടില്‍
ഒരു കടലിന്റെ മുഴുഘടികാര-
പ്പകര്‍ച്ചക്കഴ്ച്ചയില്‍
ഒരേ മുഖച്ഛായ.

അടിമുതല്‍ താടി വരെ
വിരുദ്ധമാമുടലിലൂടോര്‍മ്മ-
യിരുധ്രുവങ്ങളായ്‌ -
പ്പതഞ്ഞു പോകിലും
ഒരാള്‍ ചിതക്കുള്ളില്‍ക്കിടക്ക നീര്‍ക്കിലും
ഒരാള്‍ തലക്കുള്ളില്‍ കലപ്പ കോര്‍ക്കിലും
ഒരേ മുഖച്ഛായ.

ഒരു കടലിലെ ഒരു മുഖച്ഛായ
ഇരുവരെങ്കിലും.

വഴി

2007-06-23T04:53:00.000-07:00

ദു:ഖത്തെ
സുഖമാക്കാന്‍
ഒറ്റ വഴിയുണ്ട്‌.

ബോര്‍ഡില്‍ ദു:ഖം എന്നെഴുതുക
മായ്ക്കുക
അവിടെ സുഖം എന്നെഴുതുക.

താമസിയാതെ
കൂട്ട മണിയടിക്കും
കുട്ടികള്‍
സ്ലേറ്റും പുസ്തകവുമെടൂത്ത്‌
ഓടിമറയും.

സൂര്യാസ്തമനം കഴിയും
ഉദയം വരും
കൂട്ടമണിയടിക്കും

കുട്ടികള്‍നടന്നു കയറും

അപ്പോള്‍ സുഖത്തെ
ദു:ഖമാക്കാന്‍
ഒറ്റ വഴിയുണ്ട്‌.

ബോര്‍ഡില്‍ദു:ഖം എന്നെഴുതുക.

പാമ്പോ കുയിലോ

2007-06-23T04:45:00.000-07:00

തൊണ്ടയില്‍ കുയില്‍ക്കുഞ്ഞു
കുടുങ്ങിമരിച്ചതു
കണ്ടതു ഞാന്‍
ഉച്ചക്കങ്ങനെയുലാത്തുമ്പോള്‍

ആരുടെ മരണമാ-
ണവിടെ നടന്നതെ-
ന്നോരുവാന്‍ വെയിലെന്നെ
സമ്മതിച്ചതുമില്ല.

ജപ്പാനില്‍ സെന്‍ ബുദ്ധിസ്റ്റ്‌ കവിത ചീന്തും പോലെ
പക്ഷിസര്‍പ്പത്തിന്‍ ചിത്രം ആര്‍ട്ടിസ്റ്റ്‌ വരക്കും പോല്‍
എന്നൊക്കെ പറയുവാന്‍
വയ്യാത്തവിധം മൃതി-
യത്ര സൂക്ഷ്മവും
അരൂപവുമായിരുന്നു

ഇലകള്‍ കൊണ്ടു മൂടിമൂടിയകന്നു എല്ലാം.

എവിടെ നടന്നതെന്നറിയാന്‍
വയ്യാത്തത്രയിലകള്‍
ഒരു മരം പോലുമില്ലാതെ
പെയ്തു.

തൊടിയില്‍
ഉലാത്തുന്നുണ്ടിപ്പൊഴും
ഞാനെന്നെന്റെ
ഒമ്പതാം തലമുറക്കുട്ടികള്‍ പറയുന്നു

കുയിലും പാമ്പും ചേര്‍ന്നൊരെല്ലിന്റെ
പദപ്രശ്നം
വഴിയില്‍ത്തിളങ്ങുമ്പൊ-
ളവരും ഉലാത്തുന്നു

ആരുടെ മരണമാണവിടെ നടന്നതെ-
ന്നോരുവാന്‍ വെയിലൊട്ടും സമ്മതിച്ചതുമില്ല.

പായസം

2007-06-23T04:37:00.000-07:00

നിന്റെ മുഖത്ത്‌
ഒരു മൊന്ത നിറയെ
ചിരിപ്പായസം .

ഞാനൊരു
കല്ലെറിഞ്ഞു
മൊന്ത മറിഞ്ഞു .

നിന്റെ കരച്ചിലൊരു
കാടന്‍ പൂച്ചയെപ്പോലെയതു
നക്കിനക്കിക്കുടിച്ചു തീര്‍ക്കുമ്പൊ-
ളത്ഭുതം !
എന്റെ മുഖത്ത്‌
ഒരു മൊന്ത
നിറഞ്ഞുനിറഞ്ഞുവരുന്നു

ദേവത

2007-06-21T06:37:00.000-07:00

ചിറകടികളുടെ ദേവതയുണ്ടെന്‍
ചിറകില്‍ വാനം ചുറ്റിയടിക്കാന്‍
കൂടുണ്ടാക്കാന്‍ കൂടിന്‍ ദേവത
കൂടെ. കൂവാന്‍ തൂവല്‍ മിനുക്കാന്‍-
മുട്ടയിടാന്‍ പുഴു കൊത്തിവലിക്കാന്‍
ഒക്കെയതാതിന്‍ ദേവത. കഷ്ടം !

കൊക്കു വലത്തോട്ടൊന്നു ചെരിച്ചാ-
ലപ്പോഴുമെത്തുമതിന്റെ ദേവത
തൂത്തു കുടഞ്ഞാലതിന്റെ,യിണയെ-
ക്കൊക്കിവിളിക്കുകപോലും വിഷമം.

സ്വത്വമിതിങ്ങനെ പാഴായ്‌,
പാമ്പിന്‍ ‍പൊത്തില്‍
തല വെച്ചപ്പോള്‍
മൃതിദേവത!

മേഘപഠനങ്ങളെക്കുറിച്ച്‌...........

2007-06-20T22:31:00.000-07:00

---------------------------------
നീണ്ടു നിവര്‍ന്നു കിടക്കുന്ന ആകാശം .പരന്ന ഭുമി.
എന്റെ പഞ്ചേന്ദ്രിയങ്ങളിലൂടെ ഉള്ളിലേക്കു കടക്കുന്ന ബാഹ്യലോകം.മനസ്സില്‍ ഞാനത്‌ കൊള്ളുന്നു. ബുദ്ധിയില്‍ ചിലത്‌ വേര്‍തിരിച്ചെടുക്കുന്നു, സത്യത്തില്‍ മനസ്സിന്റേയും ബുദ്ധിയുടേയും അതിര്‍വരമ്പു തന്നെ എനിക്ക്‌ പിടി കിട്ടിയില്ലെങ്കിലും.....

ലോകത്ത്‌അറിയാന്‍ ഏറെയുണ്ട്‌.അനുഭവിക്കാനും.
എനിക്ക്‌ എടുത്തുമാറ്റാന്‍ കഴിയാത്ത എണ്ണമറ്റ ഭൗതികവസ്തുക്കളൂം വ്യവസ്ഥകളൂം കൊണ്ട്‌ എന്റെ ചുറ്റുപാട്‌ നിറഞ്ഞു കഴിഞ്ഞു. അധര്‍മ്മത്തിന്റെ കാലുകള്‍ വന്നും പോയും ഇരിക്കുന്നു.ദൈവത്തിന്റെ ശ്വാസവും കേള്‍ക്കാം.

കരുത്തുള്ള ആരെങ്കിലും എല്ലാറ്റിനും ഒരു പരിഹാരം കാണണമെന്ന് എനിക്ക്‌ ആഗ്രഹമുണ്ട്‌.ലോകത്ത്‌ എന്നെന്നും ധര്‍മം പുലരണമെന്നും സത്യം നിലനില്‍ക്കണമെന്നുമുള്ള ഇച്ഛ.

എന്നാല്‍ എന്റെ കവിതക്ക്‌ അതിനൊക്കെയുള്ള പ്രാപ്തിയുണ്ടോ? തീര്‍ച്ചയായും ഞാന്‍ അതിനെപ്പറ്റി ആലോചിച്ചിട്ടില്ല.എങ്കിലും ഭൗതിക മണ്ഡലത്തില്‍ നടക്കേണ്ട വിപ്ലവങ്ങള്‍ക്കും വ്യതിയാനങ്ങള്‍ക്കും എതിരേ എന്റെ കവിതകള്‍ ഒരിക്കലും പ്രവര്‍ത്തിക്കുകയില്ലെന്ന് ഞാന്‍ ലോകത്തിന്‌ ഉറപ്പു തരുന്നു.

എന്റെ ഒരു വാക്കു കൊണ്ട്‌ ഈ അനന്തപ്രപഞ്ചം സുന്ദരമാവുമെങ്കില്‍ ആ വാക്കിനു വേണ്ടി ഞാന്‍ നിരന്തരം പ്രാര്‍ഥിച്ചു കൊണ്ടിരിക്കും.ആരോടും....

---------------------------------

-ശ്രീകുമാര്‍ കരിയാട്‌